વર્લ્ડ ટેસ્ટ ચેમ્પિયનશિપ: ઓસ્ટ્રેલિયા સામેની બીજી ટેસ્ટ મેચ હાર્યા બાદ ભારતીય ટીમ પોઈન્ટ ટેબલમાં પહેલાથી ત્રીજા સ્થાને પહોંચી

ઓસ્ટ્રેલિયાની ટીમે બીજી ટેસ્ટ મેચમાં ભારતીય ટીમને 10 વિકેટથી હરાવીને શ્રેણી 1-1થી બરાબર કરી લીધી છે. આ મેચમાં ભારત માટે બેટ્સમેનો ખરાબ રીતે ફ્લોપ રહ્યા હતા. જ્યારે ટીમ ઈન્ડિયાની બેટિંગ લાઈનમાં રોહિત શર્મા, વિરાટ કોહલી, કેએલ રાહુલ અને યશસ્વી જયસ્વાલ જેવા બેટ્સમેન છે. ભારતીય ટીમે પ્રથમ દાવમાં 180 રન અને બીજા દાવમાં માત્ર 175 રન બનાવ્યા હતા. જ્યારે ઓસ્ટ્રેલિયાએ પ્રથમ દાવમાં 337 રનનો મોટો સ્કોર બનાવ્યો હતો. ભારતે ઓસ્ટ્રેલિયાને માત્ર 19 રનનો ટાર્ગેટ આપ્યો હતો જે ઓસ્ટ્રેલિયાએ સરળતાથી મેળવી લીધો હતો. ઓસ્ટ્રેલિયાની ટીમ નંબર વન પર પહોંચી ગઈ ભારત સામેની બીજી મેચ જીત્યા બાદ ઓસ્ટ્રેલિયાની ટીમ પોઈન્ટ ટેબલમાં પ્રથમ સ્થાને પહોંચી ગઈ છે અને તેને બે સ્થાનનો ફાયદો થયો છે. ઓસ્ટ્રેલિયાએ કુલ 14 મેચ રમી છે, જેમાંથી 9 જીતી છે અને તેનું PCT 60.71 છે. બીજી તરફ ભારતીય ટીમને હારનો ભોગ બનવું પડ્યું છે. ભારતીય ટીમ પોઈન્ટ ટેબલમાં પહેલાથી ત્રીજા સ્થાને પહોંચી ગઈ છે. ભારતીય ટીમે અત્યાર સુધી 16 મેચ રમી છે જેમાંથી 9માં તેણે જીત અને 6માં હારનો સામનો કરવો પડ્યો છે. તેનું PCT 57.29 છે. હજુ પણ ફાઇનલમાં પહોંચવાની આશા  વર્લ્ડ ટેસ્ટ ચેમ્પિયનશિપની અંતિમ મેચ આવતા વર્ષે જૂનમાં લોર્ડ્સમાં રમાશે. પોઈન્ટ ટેબલમાં ટોપ-2માં સ્થાન મેળવનારી બે ટીમ ફાઈનલ માટે ક્વોલિફાય થશે. ભારતીય ટીમ પાસે હજુ પણ ફાઇનલમાં પહોંચવાની તક છે. ટીમ ઈન્ડિયા પાસે હજુ ત્રણ ટેસ્ટ મેચ બાકી છે, જે તેણે ઓસ્ટ્રેલિયા સામે જ રમવાની છે.