અમેરિકાના રાષ્ટ્રપતિ ડોનાલ્ડ ટ્રમ્પએ ફરી એકવાર ટેરિફ બોમ્બ ફોડવાનું શરૂ કરી દીધું છે. ૯૦ દિવસની શાંતિ પછી, તે ફરીથી એક પછી એક ટેરિફ અંગે જાહેરાતો કરી રહ્યા છે જેનાથી વૈશ્વિક બજાર ડરવા લાગ્યું છે. અમેરિકામાં સ્ટીલ અને એલ્યુમિનિયમની આયાત પર સમાન ટેરિફ લાદ્યા પછી, રાષ્ટ્રપતિ ટ્રમ્પે તાંબા પર નવો ૫૦% ટેરિફ લાદવાની જાહેરાત કરી છે. તેમણે ચેતવણી પણ આપી હતી કે એક વર્ષ પછી અમેરિકામાં થતી ફાર્માસ્યુટિકલ્સની આયાત પર ૨૦૦% ટેરિફ લાદવામાં આવશે. અમેરિકાના રાષ્ટ્રપતિએ તો એ પણ સ્પષ્ટ કર્યું કે, તેઓ વિશ્વભરના ડઝનબંધ અર્થતંત્રો પર એક દિવસ પહેલા જાહેર કરાયેલા ઉચ્ચ યુએસ ટેરિફને લાગુ કરવા માટે ૧ ઓગસ્ટની સમયમર્યાદા લંબાવશે નહીં.
અમેરિકાના પ્રમુખ ડોનાલ્ડ ટ્રમ્પે જણાવ્યું હતું કે, તેઓ આયાતી સેમિકન્ડક્ટર અને ફાર્માસ્યુટિકલ્સ તેમજ કોપર પર ટેરિફ જાહેર કરવાની યોજના ધરાવે છે. તેમણે કહ્યું કે, દવાઓ પર ટેરિફ ૨૦૦% સુધી વધી શકે છે. ટ્રમ્પે કહ્યું કે, તેઓ તાંબા પર ૫૦% ટેરિફની જાહેરાત કરશે, જેનો ઉદ્દેશ્ય યુએસમાં આ ધાતુના ઉત્પાદનને વધારવાનો છે. જે ઇલેક્ટ્રિક વાહનો, લશ્કરી હાર્ડવેર, પાવર ગ્રીડ અને ઘણી ગ્રાહક ચીજવસ્તુઓ માટે મહત્વપૂર્ણ છે.ટ્રમ્પે વ્હાઇટ હાઉસ ખાતે કેબિનેટની બેઠક બાદ પત્રકારોને જણાવ્યું હતું કે, ‘જો તેમને દેશમાં દવાઓ લાવવી પડશે, તો તેમની પાસેથી ખૂબ જ ઊંચી ટેરિફ વસૂલવામાં આવશે, જેમ કે ૨૦૦%. અમે તેમને તેમના કાર્યને ગોઠવવા માટે ચોક્કસ સમય આપીશું. તેમને દોઢ વર્ષનો સમય આપવામાં આવશે. ટ્રમ્પે એમ પણ કહ્યું હતું કે, વોશિંગ્ટન ટૂંક સમયમાં ફાર્માસ્યુટિકલ્સ પર ટેરિફની જાહેરાત કરશે પરંતુ ઉત્પાદકોને તેમના કામકાજ અમેરિકામાં શિફ્ટ કરવા માટે સમય પણ આપશે.
ટ્રમ્પે તાંબા પર ટેરિફ જાહેર કરવાની યોજના વિશે વાત કરી, પરંતુ ટેરિફ કયારે લાગુ કરવામાં આવશે તે જણાવ્યું નહીં. તેમણે કહ્યું, ‘મને લાગે છે કે તાંબા પર ટેરિફ ૫૦% હશે.' અમેરિકાના વાણિજ્ય સચિવ હોવર્ડ લુટનિક એ મંગળવારે એક મુલાકાતમાં જણાવ્યું હતું કે, તાંબા પરના ટેરિફ જુલાઈના અંત અથવા ૧ ઓગસ્ટ સુધીમાં અમલમાં આવશે. તાંબાનો ઉપયોગ બાંધકામ, પરિવહન, ઇલેક્ટ્રોનિક્સ અને અન્ય ઘણા ઉદ્યોગોમાં થાય છે. અમેરિકા દર વર્ષે તેની તાંબાની જરૂરિયાતનો અડધો ભાગ આયાત કરે છે. અમેરિકાના રાષ્ટ્રપતિ ડોનાલ્ડ ટ્રમ્પે મંગળવારે કહ્યું હતું કે, તેઓ સેમિકન્ડક્ટર ટેરિફની જાહેરાત કરશે અને ખૂબ જ ટૂંક સમયમાં ફાર્માસ્યુટિકલ્સ પર પણ એક અલગ જાહેરાત કરશે. તે જ સમયે, ટ્રમ્પે બ્રિક્સ દેશો પર ૧૦% ટેરિફ લાદવાની ચેતવણી પણ આપી હતી. તેમણે કહ્યું હતું કે, ‘હું આ અંગે ટૂંક સમયમાં નિર્ણય લઈશ.'
