તાપમાન તપાસતી વખતે હિપ્પોના હુમલામાં તાલીમાર્થી પશુચિકિત્સા અધિકારીનું મોત

કર્ણાટકના શિવમોગા જિલ્લામાંથી એક ચોંકાવનારી ઘટના સામે આવી છે. જિલ્લાના ત્યાવરકોપ્પા સિંહ અને વાઘ સફારીમાં હિપ્પોના હુમલામાં એક તાલીમાર્થી પશુચિકિત્સા અધિકારી ગંભીર રીતે ઘાયલ થયા હતા. તાલીમમાં રહેલા 27 વર્ષીય પશુચિકિત્સા અધિકારીનું હિપ્પોના હુમલામાં ઘાયલ થયા બાદ મૃત્યુ થયું છે. આ ઘટનાએ લોકોને ભયભીત કરી દીધા છે. બેંગલુરુના રહેવાસી ડૉ. સમીક્ષા રેડ્ડી, તાજેતરમાં સફારીમાં તાલીમાર્થી પશુચિકિત્સા અધિકારી તરીકે નિયુક્ત થયા હતા. તેમના પર બે બીમાર સન કોન્યુરના સ્વાસ્થ્યનું નિરીક્ષણ કરવાની જવાબદારી હતી. તેઓ ગુરુવારે  રાત્રે 10:30 વાગ્યાની આસપાસ પશુચિકિત્સા હોસ્પિટલમાં હતા. બાદમાં, તેમણે ગર્ભવતી હિપ્પોપોટેમસના શરીરનું તાપમાન તપાસવાનું નક્કી કર્યું. જ્યારે તે નોન-ઇન્વેસિવ ઇન્ફ્રારેડ થર્મોગ્રાફીનો ઉપયોગ કરીને તાપમાન તપાસી રહી હતી, ત્યારે અચાનક પ્રાણીએ તેના પર હુમલો કર્યો. હુમલામાં ગંભીર રીતે ઘાયલ થયેલી ડૉ. સમીક્ષાને સફારી સ્ટાફ દ્વારા શિવમોગાની એક ખાનગી હોસ્પિટલમાં લઈ જવામાં આવી હતી. સત્તાવાર સૂત્રોના જણાવ્યા અનુસાર, તેમને ઊંડા ઘા, વધુ પડતું રક્તસ્ત્રાવ અને લીવરને નુકસાન થયું હતું, જેના કારણે કાર્ડિયાક અરેસ્ટ થયો હતો. આજે સવારે લગભગ 6:30 વાગ્યે તેમનું મોત થયું હતું.