ગુલમર્ગ ગોંડોલામાં ટેકનિકલ ખામી, 300 પ્રવાસીઓ એક કલાક સુધી ફસાયા

જમ્મુ અને કાશ્મીરના ગુલમર્ગ ગોંડોલામાં ટેકનિકલ ખામી સર્જાતાં પ્રવાસીઓ થોડા સમય માટે ગોંડોલાની અંદર હવામાં લટકતા રહ્યા. સારા સમાચાર એ છે કે તમામ પ્રવાસીઓને સુરક્ષિત રીતે બચાવી લેવામાં આવ્યા છે. મળતી માહિતી મુજબ, એશિયાના સૌથી મોટા કેબલ કાર પ્રોજેક્ટમાં ટેકનિકલ ખામી જોવા મળ્યા બાદ, અધિકારીઓએ ગોંડોલાને રોકી દીધી હતી અને લગભગ 1 કલાક સુધી ચાલેલા બચાવ કાર્યમાં, તમામ પ્રવાસીઓને સુરક્ષિત રીતે નીચે ઉતારવામાં આવ્યા હતા. ગુલમર્ગ ગોંડોલામાં લગભગ 300 પ્રવાસીઓ ફસાયેલા હતા.

"ટેકનિકલ ખામીને કારણે કેબલ કાર સેવા અસ્થાયી રૂપે સ્થગિત કરવામાં આવ્યા બાદ સરકાર ગુલમર્ગ ગોંડોલામાં પરિસ્થિતિ પર નજીકથી નજર રાખી રહી છે. બધા કેબિન સુરક્ષિત છે અને ફસાયેલા પ્રવાસીઓને સુરક્ષિત રીતે બહાર કાઢવા માટે તાલીમ પામેલી ટીમો સાથે બચાવ કામગીરી ચાલી રહી છે. પરિસ્થિતિ સંપૂર્ણપણે નિયંત્રણમાં છે અને ગભરાવાની કોઈ જરૂર નથી," જમ્મુ અને કાશ્મીરના મુખ્યમંત્રી ઓમર અબ્દુલ્લાના કાર્યાલયે ટ્વિટર પર લખ્યું હતું.

ગુલમર્ગ ગોંડોલાના પહેલા તબક્કામાં ટેકનિકલ ખામી સર્જાઈ હતી, જેના કારણે 300 પ્રવાસીઓના જીવ એક કલાક માટે જોખમમાં મુકાયા હતા. બધા પ્રવાસીઓ સુરક્ષિત છે અને બચાવ કામગીરી પૂર્ણ થઈ ગઈ છે. અધિકારીઓએ ગોંડોલાને હવામાં જ સ્થગિત કરીને તાત્કાલિક રોકી દીધી હતી. ત્યારબાદ બચાવ ટીમોએ ગોંડોલામાં સવાર આશરે 300 પ્રવાસીઓને બચાવી લીધા હતા. અપ અને ડાઉન બંને રૂટ માટે ગોંડોલા સેવાઓ અસ્થાયી રૂપે સ્થગિત કરવામાં આવી છે. અધિકારીઓએ પુષ્ટિ આપી હતી કે બધા પ્રવાસીઓ સુરક્ષિત છે અને સફળતાપૂર્વક તેમના ગંતવ્ય સ્થાન પર પહોંચી ગયા છે.