સિદ્ધપુર ડિવિઝનના 37 ગુનાઓમાં પકડાયેલ 34,903 બોટલોનો નાશ કરવામાં આવ્યો છે.પાટણ જિલ્લાના સિદ્ધપુર ડિવિઝન હેઠળના પાંચ પોલીસ સ્ટેશનોમાં જપ્ત કરાયેલા વિદેશી દારૂના મોટા જથ્થાનો નાશ કરવા કોર્ટના આદેશ બાદ કુલ 37 ગુનાઓમાં પકડાયેલી 34,903 દારૂની બોટલો અને ટીનનો નાશ કરાયો હતો, જેની કુલ કિંમત રૂ. 1,06,19,725 થાય છે.આ કાર્યવાહી સરસ્વતી તાલુકાના ચોરમારપુરા ગામની સીમમાં સત્તાવાળાઓની હાજરીમાં હાથ ધરવામાં આવી હતી.
સિદ્ધપુર ડિવિઝન હેઠળના કાકોશી પોલીસ સ્ટેશનના 11 ગુના, બાલીસણાના 3, રણુંજના 2, સરસ્વતીના 11 અને વાગડોદ પોલીસ સ્ટેશનના 10 ગુના મળીને કુલ 37 ગુનાઓનો મુદ્દામાલ એકત્રિત કરાયો હતો.આ દારૂના જથ્થાનો નાશ કરવા માટે નામદાર કોર્ટમાંથી કાયદેસરનો હુકમ મેળવવામાં આવ્યો હતો. આ કામગીરી માટે પાટણ-સિદ્ધપુરના સબ ડિવિઝનલ મેજિસ્ટ્રેટના વડપણ હેઠળ એક વિશેષ સમિતિની રચના કરવામાં આવી હતી. જેમાં સિદ્ધપુર વિભાગના ઇન્ચાર્જ નાયબ પોલીસ અધિક્ષક મહેન્દ્રસિંહ બી. સોલંકી, પાટણના નશાબંધી અને આબકારી અધિકારી તેમજ સંબંધિત થાણા ઇન્ચાર્જો ઉપસ્થિત રહ્યા હતા.આ તમામ અધિકારીઓની પ્રત્યક્ષ હાજરીમાં, સરસ્વતી તાલુકાના મોજે-ચોરમારપુરા ગામની સરકારી પડતર ખરાબાની જમીનમાં, સરકારી ગોડાઉનની પાછળ અને સુજનીપુર રોડ નજીક સમગ્ર જથ્થા પર રોલર ફેરવીને નાશ કરવાની પ્રક્રિયા પૂર્ણ કરવામાં આવી હતી.
