પ્રાંતિજ હાઈવે પર ટ્રક કન્ટેનરમાં ભીષણ આગ: એક્સલ તૂટતા કેનાલની રેલિંગ સાથે અથડાઈ, લાખોનો સામાન ખાખ

સાબરકાંઠાના પ્રાંતિજ નેશનલ હાઈવે પર આજે એક ભયાનક અકસ્માત સાથે આગની દુર્ઘટના સર્જાઈ હતી. ઇલેક્ટ્રોનિક્સ સામાન ભરીને પસાર થઈ રહેલા એક વિશાળ કન્ટેનરનું ચાલુ ગાડીએ અચાનક એક્સલ તૂટી જતાં ચાલકે સ્ટીયરિંગ પરનો કાબૂ ગુમાવ્યો હતો. બેકાબૂ બનેલું કન્ટેનર હાઈવે નજીક કેનાલની રેલિંગ સાથે ધડાકાભેર અથડાયું હતું. ટક્કર એટલી જોરદાર હતી કે અથડામણ બાદ કન્ટેનરમાં તુરંત જ ભીષણ આગ ફાટી નીકળી હતી. જોતજોતામાં આગની જ્વાળાઓએ આખા કન્ટેનરને લપેટમાં લઈ લેતા તેમાં રહેલો લાખો રૂપિયાનો ઇલેક્ટ્રોનિક્સ સામાન બળીને ખાખ થઈ ગયો હતો. ઘટનાને પગલે હાઈવે પર ટ્રાફિક જામના દ્રશ્યો સર્જાયા હતા અને સ્થાનિકોની દોડધામ મચી ગઈ હતી.