મમતા અને ભાજપ એક જ સિક્કાની બે બાજુ છે', ઓવૈસીએ બંગાળમાં તૃણમૂલ પર કર્યા પ્રહારો

ઓલ ઈન્ડિયા મજલિસ-એ-ઇત્તેહાદુલ મુસ્લિમીન (AIMIM) ના વડા અસદુદ્દીન ઓવૈસીએ મુર્શિદાબાદમાં એક રેલીમાં તૃણમૂલ કોંગ્રેસ પર આકરા પ્રહારો કર્યા. તેમણે આરોપ લગાવ્યો કે બંગાળમાં મુસ્લિમોનો ઉપયોગ ફક્ત વોટ બેંક તરીકે કરવામાં આવી રહ્યો છે, જ્યારે વિકાસના નામે તેમને પાછળ છોડી દેવામાં આવ્યા છે. ઓવૈસીએ કહ્યું કે મમતા અને ભાજપ બંને એક જ સિક્કાની બે બાજુ છે. તેમણે હુમાયુ કબીરના નેતૃત્વ હેઠળના AJUP ના ઉમેદવારોના સમર્થનમાં મુર્શિદાબાદ જિલ્લાના નાઓડામાં એક ચૂંટણી રેલીને સંબોધિત કરતી વખતે આ વાત કહી.

અસદુદ્દીન ઓવૈસીએ બુધવારે આરોપ લગાવ્યો હતો કે પશ્ચિમ બંગાળમાં શાસક તૃણમૂલ કોંગ્રેસ અને અન્ય પક્ષોએ મુસ્લિમોનો વોટ બેંક તરીકે ઉપયોગ કર્યો હતો પરંતુ સમુદાયના વિકાસ માટે કંઈ કર્યું નથી. ઓવૈસીએ એવો પણ દાવો કર્યો હતો કે છેલ્લા 50 વર્ષોમાં, મુસ્લિમ સમુદાયે કોંગ્રેસ, ડાબેરી મોરચા અને તૃણમૂલ કોંગ્રેસને મત આપ્યા છે, પરંતુ તેમની સ્થિતિમાં કોઈ સુધારો થયો નથી. 

તેમણે કહ્યું કે, અમે પશ્ચિમ બંગાળમાં મુસ્લિમોના રાજકીય નિર્ણય લેવામાં અને તેમના વાસ્તવિક વિકાસમાં વધુ પ્રતિનિધિત્વ સુનિશ્ચિત કરવા માટે કબીર સાથે જોડાયા છીએ. સાથે મળીને, અમે મમતા બેનર્જી અને તેમના ટીએમસી પક્ષને કારમી ફટકો આપીશું. રેલીને સંબોધતા ઓવૈસીએ કહ્યું, મુસ્લિમ સમુદાયમાંથી એવા નેતાઓને ચૂંટવાનો સમય આવી ગયો છે જે તમારા આર્થિક વિકાસને સુનિશ્ચિત કરી શકે.