બ્રિટન PM કીર સ્ટાર્મરનું રાજીનામું! 10 વર્ષમાં પદ છોડનારા 6ઠ્ઠા વડાપ્રધાન!

બ્રિટનના વડાપ્રધાન કીર સ્ટાર્મરે પીએમ પદ અને લેબર પાર્ટીના નેતા પદ પરથી અચાનક રાજીનામું આપીને સમગ્ર વિશ્વને ચોંકાવી દીધું છે. 10 ડાઉનિંગ સ્ટ્રીટની બહાર દેશને સંબોધન કરતા સ્ટાર્મરે સ્વીકાર્યું કે, લેબર પાર્ટીને હવે એવું નથી લાગતું કે તેઓ આગામી ચૂંટણીમાં નેતૃત્વ કરવા માટે યોગ્ય વ્યક્તિ છે. આ જાહેરાત સાથે જ બ્રિટનમાં રાજકીય અસ્થિરતા વધુ ઘેરી બની છે.

આપને જણાવી દઈએ કે, ૨૦૨૪માં લેબર પાર્ટીને પ્રચંડ બહુમતી અપાવનાર કીર સ્ટાર્મરની લોકપ્રિયતા છેલ્લા કેટલાક મહિનાઓથી સતત ઘટી રહી હતી. મોંઘવારી, જીવનધોરણમાં સુધારો કરવામાં નિષ્ફળતા અને અવારનવાર લીધેલા નીતિગત યુ-ટર્નને કારણે પાર્ટીની અંદર જ તેમની સામે અસંતોષની જવાળાઓ ભભૂકી ઉઠી હતી. બ્રિટિશ રાજકારણમાં આ કોઈ નવી વાત નથી. કીર સ્ટાર્મર છેલ્લા ૧૦ વર્ષમાં પોતાનો કાર્યકાળ પૂરો કર્યા વિના જ પદ છોડનારા છઠ્ઠા બ્રિટિશ વડાપ્રધાન બન્યા છે. તેમની પહેલા ડેવિડ કેમરન, થેરેસા મે, બોરિસ જોન્સન, લિઝ ટ્રસ અને ઋષિ સુનકે પણ અધવચ્ચે જ ગાદી છોડવી પડી હતી.

કીર સ્ટાર્મરે સ્પષ્ટ કર્યું છે કે, જ્યાં સુધી આગામી વડાપ્રધાનની પસંદગી ન થાય ત્યાં સુધી તેઓ કાર્યવાહક પીએમ તરીકે રહેશે અને આ અંગે તેમણે બ્રિટિશ કિંગ સાથે પણ વાત કરી લીધી છે. બીબીસીના અહેવાલ મુજબ, આ રેસમાં એન્ડી બર્નહેમ સૌથી આગળ ચાલી રહ્યા છે, જેમણે તાજેતરમાં જ મેકરફિલ્ડ પેટાચૂંટણી જીતીને સંસદમાં ધમાકેદાર વાપસી કરી છે. પૂર્વ સ્વાસ્થ્ય મંત્રી વેસ સ્ટ્રીટિંગ પણ દાવેદારી નોંધાવી શકે છે.