જોસ બટલરે ઇતિહાસ રચ્યો, ઇંગ્લેન્ડ માટે આવી સિદ્ધિ મેળવનાર પ્રથમ ખેલાડી બન્યો

T20 વર્લ્ડ કપ પહેલા ઇંગ્લેન્ડ અને શ્રીલંકા વચ્ચે ત્રણ મેચની T20 સિરીઝ રમાઈ રહી છે. સિરીઝ ની બીજી મેચ 1 ફેબ્રુઆરીના રોજ પલ્લેકેલે ઇન્ટરનેશનલ સ્ટેડિયમ ખાતે રમાઈ હતી, જ્યાં ઇંગ્લેન્ડે DLS પદ્ધતિ હેઠળ 6 વિકેટથી જીત મેળવી હતી. આ જીત સાથે, ઇંગ્લેન્ડે સિરીઝ માં 2-0 ની અજેય લીડ મેળવી લીધી છે. આ મેચમાં, ઇંગ્લેન્ડના દિગ્ગજ વિકેટકીપર-બેટ્સમેન જોસ બટલરે નવો ઇતિહાસ રચ્યો હતો. શ્રીલંકા સામેની બીજી T20 મેચ દરમિયાન, તેણે એક એવી સિદ્ધિ હાંસલ કરી જે તેના પહેલા કોઈ અન્ય ઇંગ્લેન્ડનો ખેલાડી હાંસલ કરી શક્યો ન હતો. જોસ બટલર માટે, આ તેમની કારકિર્દીની 402મી આંતરરાષ્ટ્રીય મેચ હતી, જેના કારણે તેઓ ઇંગ્લેન્ડ માટે સૌથી વધુ આંતરરાષ્ટ્રીય મેચ રમવાનો રેકોર્ડ ધરાવે છે. અગાઉ, ઇંગ્લેન્ડ માટે સૌથી વધુ આંતરરાષ્ટ્રીય મેચ રમવાનો રેકોર્ડ ભૂતપૂર્વ દિગ્ગજ ઝડપી બોલર જેમ્સ એન્ડરસનના નામે હતો, જેમણે 401 આંતરરાષ્ટ્રીય મેચ રમી હતી, અને બટલરે હવે તેમને પાછળ છોડી દીધા છે. વધુમાં, તે હવે T20 આંતરરાષ્ટ્રીય મેચોમાં સૌથી વધુ રન બનાવનારા ખેલાડીઓમાં ચોથા ક્રમે છે. જો રૂટ જોસ બટલર અને જેમ્સ એન્ડરસન પછી ઇંગ્લેન્ડ માટે સૌથી વધુ આંતરરાષ્ટ્રીય મેચ રમનાર ત્રીજા ક્રમે છે. તેમણે ઇંગ્લેન્ડ માટે 384 આંતરરાષ્ટ્રીય મેચ રમી છે. ઇયોન મોર્ગન ચોથા ક્રમે છે, જેમણે ઇંગ્લેન્ડ માટે 356 મેચ રમી છે. ભૂતપૂર્વ ઝડપી બોલર સ્ટુઅર્ટ બ્રોડ 344 મેચો સાથે પાંચમા ક્રમે છે. 35 વર્ષીય જોસ બટલરની કારકિર્દીની વાત કરીએ તો, તેમણે અત્યાર સુધીમાં 57 ટેસ્ટ મેચ રમી છે. આ ઉપરાંત, તેમણે ઈંગ્લેન્ડ માટે 199 વનડે અને ૧૪૬ ટી20 આંતરરાષ્ટ્રીય મેચ રમી છે. બટલરે ટેસ્ટમાં 2907 રન, વનડેમાં ૫૫૧૫ રન અને ટી20 આંતરરાષ્ટ્રીય મેચમાં 3925 રન બનાવ્યા છે. હવે તેમના નામે 402 આંતરરાષ્ટ્રીય મેચોમાં 12308 રન છે.