બેડમિન્ટન એશિયા ચેમ્પિયનશિપમાં ભારતનો મેડલ નિશ્ચિત

ચીનના નિંગબો ઓલિમ્પિક સ્પોર્ટ્સ સેન્ટર ખાતે 11 એપ્રિલે રમાયેલી બેડમિન્ટન એશિયા ચેમ્પિયનશિપ 2026 માં પુરુષોની સિંગલ્સની સેમિફાઇનલ મેચમાં મોટો અપસેટ જોવા મળ્યો, જેમાં 20 વર્ષીય ભારતીય ખેલાડી આયુષ શેટ્ટીએ ડિફેન્ડિંગ ચેમ્પિયન અને વર્તમાન વિશ્વ નંબર 1 ખેલાડી કુનલાવુત વિતિદસર્નને હરાવીને ફાઇનલમાં પોતાનું સ્થાન સુરક્ષિત કર્યું. આ સાથે, કોઈ ભારતીય ખેલાડીએ 60 વર્ષ પછી પુરુષોની સિંગલ્સની ફાઇનલમાં જગ્યા બનાવી છે. ત્રણ સેટ સુધી ચાલેલી સેમિફાઇનલ મેચમાં આયુષ શેટ્ટીની શરૂઆત સારી રહી ન હતી, પરંતુ બાદમાં તે 2-1 ના માર્જિનથી મેચ જીતવામાં સફળ રહ્યો હતો.

બેડમિન્ટન એશિયા ચેમ્પિયનશિપ 2026 ના સેમિફાઇનલ સુધી આયુષ શેટ્ટીનો પ્રવાસ ખૂબ જ પ્રભાવશાળી રહ્યો, તેણે પોતાની રમતથી બધાને પ્રભાવિત કર્યા. સેમિફાઇનલમાં, તેનો સામનો વિશ્વના નંબર વન કુનલાવુત વિતિદસર્ન સામે થયો, જે એક પડકાર હતો જેને હરાવવાનું સરળ નહોતું. શેટ્ટીની મેચની શરૂઆત ખરાબ રહી, પહેલો સેટ 10-21 થી હારી ગયો. ત્યારબાદ આયુષે બીજા સેટમાં જોરદાર વાપસી કરી, કુનલાવુત વિતિદસર્નને 21-19 થી હરાવીને મેચ 1-1 થી બરાબર કરી હતીુ.

આ સેમિફાઇનલ મેચમાં, જ્યારે બે સેટ પછી મેચ 1-1 થી બરાબર હતી, ત્યારે બધાની નજર છેલ્લા અને નિર્ણાયક સેટ પર હતી. આયુષ શેટ્ટીએ આ સેટમાં પોતાનું વર્ચસ્વ જાળવી રાખ્યું અને તેને 21-17 ના માર્જિનથી જીતીને ફાઇનલમાં પોતાનું સ્થાન નિશ્ચિત કર્યું. આયુષ શેટ્ટી અને કુનલાવુત વિતિદસર્ન વચ્ચેની આ સેમિફાઇનલ મેચ લગભગ 75 મિનિટ સુધી ચાલી. આ જીત સાથે, આયુષ શેટ્ટીએ 60 વર્ષ પછી ભારત માટે ઇતિહાસ રચ્યો અને ઓછામાં ઓછો સિલ્વર મેડલ નિશ્ચિત કર્યો. હવે ફાઇનલમાં, આયુષનો સામનો ચાઇનીઝ તાઇપેઈના ચોઉ ટિએન ચેન અથવા ચીનના બીજા ક્રમાંકિત શી યુ ક્વિ સામે થશે.