પોશીના સાબરકાંઠા જિલ્લાના પોશીના તાલુકાના લાંબડીયા સ્થિત આંગણવાડી કેન્દ્ર ખાતે આરોગ્ય અને લોકશાહીના પર્વનો ત્રિવેણી સંગમ જોવા મળ્યો હતો. અહીં નિયમિતપણે યોજાતા 'મમતા દિવસ'ની ઉજવણીની સાથે આગામી સ્થાનિક સ્વરાજ્યની ચૂંટણી-૨૦૨૬ને ધ્યાનમાં રાખીને 'મતદાન જાગૃતિ' કાર્યક્રમનું વિશેષ આયોજન કરવામાં આવ્યું હતું.
આ કાર્યક્રમ અંતર્ગત આંગણવાડીની કાર્યકર બહેનો, તેડાગર બહેનો તેમજ મોટી સંખ્યામાં ઉપસ્થિત રહેલી સ્થાનિક મહિલાઓને મતદાનનું મહત્વ સમજાવવામાં આવ્યું હતું. લોકશાહીના પર્વમાં એક-એક મતના મૂલ્ય વિશે માહિતગાર કરી, ગ્રામીણ સ્તરે વધુમાં વધુ મતદાન થાય તે માટે પ્રેરિત કરવામાં આવ્યા હતા.
કાર્યક્રમના અંતે ઉપસ્થિત તમામ મહિલાઓએ દેશના જવાબદાર નાગરિક તરીકે લોકશાહીની ગરિમા જાળવવા અને કોઈપણ લોભ-લાલચ વગર 'અચૂક મતદાન' કરવાના સામૂહિક શપથ લીધા હતા. આ પ્રસંગે 'સ્માર્ટ આંગણવાડી' અને 'ન્યુ પેટર્ન ગુજરાત' અંતર્ગત વિવિધ વિકાસલક્ષી પાસાઓ વિશે પણ ચર્ચા કરવામાં આવી હતી.
આમ, લાંબડીયા આંગણવાડી ખાતે માતા અને બાળકના આરોગ્યની દરકાર સાથે રાષ્ટ્રના મજબૂત ભવિષ્ય માટે મતદાન જાગૃતિનો સુંદર પ્રયાસ કરવામાં આવ્યો હતો.
