ચાર્લી ડેવિસનું 82 વર્ષની વયે અવસાન

વેસ્ટ ઈન્ડિઝ ક્રિકેટને લઈને એક મોટા સમાચાર સામે આવ્યા છે. ભૂતપૂર્વ સ્ટાર બેટ્સમેન ચાર્લી ડેવિસનું 82 વર્ષની વયે અવસાન થયું છે. તેમના શાનદાર ટેસ્ટ કારકિર્દીમાં માત્ર થોડી જ મેચ રમ્યા હોવા છતાં, તેમણે એક એવી છાપ છોડી દીધી જે આજે પણ તેમને વેસ્ટ ઈન્ડિઝના શ્રેષ્ઠ બેટ્સમેનોમાં એક ખાસ સ્થાન આપે છે. ક્રિકેટ વેસ્ટ ઈન્ડિઝે તેમના નિધન પર ઊંડી શોક વ્યક્ત કરી હતી, જ્યારે શ્રીલંકા સામે ચાલી રહેલી પ્રથમ ટેસ્ટના ત્રીજા દિવસે, વેસ્ટ ઈન્ડિઝના ખેલાડીઓએ કાળી પટ્ટી પહેરીને તેમને શ્રદ્ધાંજલિ આપી હતી.


ત્રિનિદાદ અને ટોબેગોની રાજધાની પોર્ટ ઓફ સ્પેનમાં જન્મેલા ચાર્લી ડેવિસે 1968 થી 1973 દરમિયાન વેસ્ટ ઈન્ડિઝ માટે 15 ટેસ્ટ મેચ રમી હતી. આ સમયગાળા દરમિયાન તેમણે 54.20 ની પ્રભાવશાળી સરેરાશથી 1301 રન બનાવ્યા હતા. તેમણે ચાર સદી અને ચાર અડધી સદી નોંધાવી હતી. તેમનો સર્વોચ્ચ સ્કોર 183 હતો.

 પહેલી ટેસ્ટ સદી 1969 ના ઈંગ્લેન્ડ પ્રવાસ દરમિયાન ઐતિહાસિક લોર્ડ્સ મેદાન પર આવી હતી. પોતાની ત્રીજી ટેસ્ટમાં જ તેમણે 103 રન બનાવીને આંતરરાષ્ટ્રીય ક્રિકેટમાં પોતાની છાપ છોડી દીધી હતી. 1971 ની ભારત સામેની ઘરઆંગણેની ટેસ્ટ શ્રેણી તેમની કારકિર્દીની સૌથી યાદગાર શ્રેણીઓમાંની એક હતી. તે શ્રેણીમાં તેમણે ચાર મેચમાં 132.25ની સરેરાશથી 529 રન બનાવ્યા હતા. તેમણે બે સદી પણ ફટકારી હતી અને ભારતીય બોલરો સામે શાનદાર બેટિંગ પ્રદર્શન કર્યું હતું.

વેસ્ટ ઇન્ડીઝના બેટ્સમેનોમાં જેમણે ઓછામાં ઓછા 1,000 ટેસ્ટ રન બનાવ્યા છે, ચાર્લી ડેવિસની સરેરાશ હજુ પણ શ્રેષ્ઠમાંની એક માનવામાં આવે છે. ફક્ત જ્યોર્જ હેડલી, એવર્ટન વીક્સ, સર ગારફિલ્ડ સોબર્સ અને ક્લાઈડ વોલકોટ જેવા મહાન ખેલાડીઓની સરેરાશ વધુ સારી છે.