મારુતિ, ટાટા, મહિન્દ્રાના વેચાણમાં બમ્પર વધારો

જુલાઈમાં મારુતિ સુઝુકી ઈન્ડિયા લિમિટેડનું કુલ વેચાણ 34 ટકા વધીને 2,41,421 યુનિટ થયું છે, જે ગયા વર્ષે જુલાઈમાં 1,80,526 યુનિટ હતું. જુલાઈમાં કંપનીનું સ્થાનિક પેસેન્જર કાર વેચાણ 43.4 ટકા વધીને 1,96,203 યુનિટ થયું છે, જે જુલાઈ ૨૦૨૫માં 1,37,776 યુનિટ હતું. જુલાઈ 2026માં, કંપનીએ સ્થાનિક બજારમાં પેસેન્જર કાર વેચાણમાં તેનું અત્યાર સુધીનું શ્રેષ્ઠ પ્રદર્શન નોંધાવ્યું. 

જુલાઈ 2026 માં ટાટા મોટર્સ પેસેન્જર વ્હીકલ્સ લિમિટેડનું કુલ વેચાણ 59 ટકા વધીને 63,760 યુનિટ થયું છે જે ગયા વર્ષના સમાન સમયગાળામાં 40,175 યુનિટ હતું. ટાટા મોટર્સે એક નિવેદનમાં જણાવ્યું હતું કે કંપનીના સ્થાનિક પેસેન્જર વાહનોનું વેચાણ જુલાઈ 2026 માં 58 ટકા વધીને 62,611 યુનિટ થયું છે જે જુલાઈ 2025 માં 39,521 કાર હતું. આંતરરાષ્ટ્રીય બજારમાં પેસેન્જર વાહનોનું વેચાણ ગયા વર્ષના જુલાઈમાં 654 યુનિટની તુલનામાં 76 ટકા વધીને 1,149 યુનિટ થયું છે. કંપનીએ જણાવ્યું હતું કે જુલાઈ 2026 માં ઇલેક્ટ્રિક પેસેન્જર કારનું કુલ વેચાણ 15,217 યુનિટ થયું છે, જે જુલાઈ 2025 માં 7,124 યુનિટની તુલનામાં 114 ટકાનો વધારો દર્શાવે છે.

જુલાઈમાં મહિન્દ્રા એન્ડ મહિન્દ્રાના કુલ વાહનોનું વેચાણ 26 ટકા વધીને 1,03,860 યુનિટ થયું. કંપનીએ શનિવારે જણાવ્યું હતું કે જુલાઈ 2026 દરમિયાન, સ્થાનિક બજારમાં યુટિલિટી વાહનો (SUV)નું વેચાણ 20 ટકા વધીને 60,048 યુનિટ થયું હતું, જે જુલાઈ 2025માં 49,871 યુનિટ હતું. મહિન્દ્રાએ જણાવ્યું હતું કે જુલાઈમાં કંપનીના સ્થાનિક વાણિજ્યિક વાહનોનું વેચાણ 23 ટકા વધીને 25,204 થયું હતું. કંપનીએ જણાવ્યું હતું કે જુલાઈ 2026માં તેની કુલ નિકાસ 47 ટકા વધીને 4,070 મહિન્દ્રા થઈ હતી.

જુલાઈ 2026 માં હ્યુન્ડાઇ મોટર ઇન્ડિયા લિમિટેડનું વેચાણ 25.4 ટકા વધીને 75,360 યુનિટ થયું. આ કંપનીનું અત્યાર સુધીનું સૌથી વધુ માસિક વેચાણ છે. હ્યુન્ડાઇએ જણાવ્યું હતું કે સ્થાનિક બજારમાં પણ કંપનીનું વેચાણ અત્યાર સુધીનું સૌથી વધુ 54,210 યુનિટ હતું, જે ગયા વર્ષના જુલાઈ કરતા 23.3 ટકા વધુ છે. કંપનીના સીઈઓ અને એમડી તરુણ ગર્ગે જણાવ્યું હતું કે, "અમે નવા ક્વાર્ટરની શરૂઆત મજબૂત પ્રદર્શન સાથે કરી છે. જુલાઈમાં કુલ 75,360 વાહનોનું વેચાણ કંપનીના ઇતિહાસમાં સૌથી વધુ માસિક વેચાણ છે."