વિદેશી દારૂ-બિયરના 777 નંગ, કિંમત રૂ. 2.53 લાખથી વધુનો મુદ્દામાલ કબજે
બનાસકાંઠા જિલ્લામાં દારૂબંધીના કડક અમલ અને રાજસ્થાન તરફથી થતી ગેરકાયદેસર દારૂની હેરાફેરી અટકાવવા પોલીસ દ્વારા સઘન કાર્યવાહી હાથ ધરવામાં આવી રહી છે. જેના ભાગરૂપે એલ.સી.બી. બનાસકાંઠાની ટીમે ખારીયા ગામની સીમમાં દરોડો પાડી ભારતીય બનાવટ ના વિદેશી દારૂ અને બિયરના 777 નંગ, કિંમત રૂ. 2,53,676/- નો મુદ્દામાલ ઝડપી પાડ્યો છે. પોલીસ મહાનિરીક્ષક બનાસકાંઠા રેન્જ પાલનપુર પરીક્ષિતા રાઠોડ, IPS તથા પોલીસ અધિક્ષક બનાસકાંઠા પ્રશાંત સુંબે, IPSની સૂચના અને માર્ગદર્શન હેઠળ એલ.સી. બી.ની અલગ-અલગ ટીમો દ્વારા દારૂબંધી અંગે કાર્યવાહી હાથ ધરવામાં આવી હતી.
દરમિયાન એલ.સી.બી. ટીમને મળેલી બાતમીના આધારે ખારીયા ગામની સીમમાં ગજેન્દ્રસિંહ અભેસિંહ વાઘેલાના ખેતરમાં આવેલા રહેણાંક મકાનમાં રેડ કરવામાં આવી હતી. પોલીસ રેડ દરમિયાન મકાન માલિક ગજેન્દ્રસિંહ વાઘેલા હાજર મળી આવ્યો નહોતો. મકાનની તલાશી લેતા અંદરથી ભારતીય બનાવટના વિદેશી દારૂની બોટલો તથા બિયરના ટીન મળી આવ્યા હતા. પોલીસે કુલ 777 નંગ દારૂની બોટલ/બિયરના ટીન, કિંમત રૂ. 2,53,676/-નો મુદ્દામાલ કબજે કરી આરોપી વિરુદ્ધ થરા પોલીસ સ્ટેશનમાં ગુનો નોંધી વધુ તપાસ હાથ ધરી છે.
