(જી.એન.એસ) તા. ૧
(જીતુ ઉપાધ્યાય)
હિંમતનગર,
નશીલા પદાર્થ નું વહેચણ અટકાવવામાં અને આ કાળા કારોબારને નાબુદ કરવામાં હિંમતનગર પોલીસને વધુ એક સફળતા મળી છે જેમાં, શહેરના હડિયોલપુલ છાપરિયા વિસ્તારમાં આવેલી આવાસ યોજનામાં બાતમીના આધારે દરોડો પાડી ગાંજાનો મોટો જથ્થો ઝડપી પાડ્યો છે. આવાસ યોજનાના બી-બ્લોકમાં આવેલા એક મકાનમાંથી પોલીસે લાખોની કિંમતનો ગાંજો જપ્ત કરી એક આરોપીની ધરપકડ કરી છે, જ્યારે અન્ય બે શખસોની શોધખોળ શરૂ કરી છે.
હિંમતનગર ‘એ’ ડિવિઝન પોલીસને ચોક્કસ બાતમી મળી હતી કે આવાસ યોજનાના એક મકાનમાં માદક પદાર્થોનો સંગ્રહ કરવામાં આવ્યો છે. આ બાતમીના આધારે ટીમે દરોડો પાડ્યા હતા. ઘરની તપાસ દરમિયાન પ્લાસ્ટિકના બે થેલામાં સંતાડીને રાખેલો ગાંજો મળી આવ્યો હતો. પોલીસે કુલ 6 કિલો 413 ગ્રામ ગાંજો જપ્ત કર્યો છે. પકડાયેલા ગાંજાની આંતરરાષ્ટ્રીય બજાર કિંમત આશરે 3,20,650 રૂપિયા જેટલી થાય છે.
આ મામલે પોલીસે મકાનમાં હાજર શંકર સલાટ નામના શખસની ધરપકડ કરી છે. જોકે, આ ગુનામાં અન્ય સવાભાઈ અને ભરત નામના આરોપીઓને ઝડપી પાડવા માટે અલગ-અલગ ટીમો બનાવી તપાસ તેજ કરી છે. ત્રણેય આરોપીઓ વિરુદ્ધ પોલીસે NDPS Act (નાર્કોટિક્સ ડ્રગ્સ એન્ડ સાયકોટ્રોપિક સબસ્ટન્સ એક્ટ) હેઠળ ગુનો નોંધી કાયદેસરની કાર્યવાહી હાથ ધરી છે. આ જથ્થો પોશીનાથી કોણે મોકલ્યો હતો અને હિંમતનગરમાં કોને પહોંચાડવાનો હતો, તે દિશામાં પોલીસ ઊંડાણપૂર્વક તપાસ કરી રહી છે.
Source link
