અરવલ્લી જિલ્લામાં ગેરકાયદેસર પ્રોહિબિશન અને નશીલા પદાર્થોની હેરાફેરી અટકાવવા માટે પોલીસ પ્રશાસન દ્વારા કડક ઝુંબેશ ચલાવવામાં આવી રહી છે. જેમાં જિલ્લા પોલીસ અધિક્ષક મનોહરસિંહ એન. જાડેજાની સૂચના હેઠળ, લોકલ ક્રાઈમ બ્રાન્ચ એ શામળાજી પોલીસ સ્ટેશન વિસ્તારમાંથી રૂ. ૪,૭૩,૨૮૦/- ની કિંમતનો વિદેશી દારૂ અને ઈકો ગાડી મળી કુલ રૂ. ૯,૭૩,૨૮૦/- નો મુદ્દામાલ ઝડપી પાડી એક ગણનાપાત્ર કેસ શોધી કાઢ્યો છે.
એલ.સી.બી. પોલીસ ઇન્સપેકટર એમ.એચ. ઝાલાના નેતૃત્વમાં પીએસઆઈ શ્રી વી.ડી. વાઘેલા, પીએસઆઈ પી.પી. સોલંકી અને એલ.સી.બી. ટીમ શામળાજી વિસ્તારમાં પ્રોહીબિશન લગત પેટ્રોલીંગમાં હતી. આ દરમિયાન રતનપુર (રાજસ્થાન) તરફથી આવતી એક શંકાસ્પદ સફેદ કલરની મારૂતી ઈકો ગાડીને પોલીસે રોકવાનો ઈશારો કર્યો હતો. પરંતુ, ચાલકે ગાડી ઉભી રાખવાને બદલે પૂરઝડપે અને ગફલતભરી રીતે શામળાજી આશ્રમ તરફ ભગાડી મૂકી હતી. પોલીસ ટીમે તુરંત જ આ ગાડીનો પીછો શરૂ કર્યો હતો.
પોલીસને પાછળ આવતી જોઈ ચાલકે ગાડી નાપડા કંપા સ્ટેન્ડ નજીક, શામળાજીથી હિંમતનગર તરફ જતા નેશનલ હાઈ-વે રોડની સાઈડમાં ઉભી રાખી દીધી હતી. અને ગાડીનો ચાલક તેમજ તેની બાજુમાં બેઠેલો અન્ય એક ઇસમ અંધારાનો લાભ લઈ ખેતરો તરફ ભાગી છૂટ્યા હતા. પોલીસે બિનવારસી હાલતમાં પડેલી મારૂતી ઈકો ગાડીની તલાશી લેતા તેમાંથી ભારતીય બનાવટના વિદેશી દારૂ અને બિયરની કુલ ૩૧ પેટીઓ મળી આવી હતી, જેમાં કુલ ૧,૦૬૮ નંગ બોટલ/ટીન (કિંમત રૂ. ૪,૭૩,૨૮૦/-) અને રૂ. ૫,૦૦,૦૦૦/- ની કિંમતની ઈકો ગાડી મળી કુલ રૂ. ૯,૭૩,૨૮૦/- નો મુદ્દામાલ જપ્ત કરવામાં આવ્યો હતો. આ મામલે શામળાજી પોલીસ સ્ટેશનમાં કાયદેસરની કાર્યવાહી હાથ ધરીને ફરાર થયેલા બંને અજાણ્યા આરોપીઓ વિરુદ્ધ ગુનો નોંધી વધુ તપાસ શરૂ કરવામાં આવી છે.
