મમતા બેનર્જી વિરુદ્ધ વધું એક FIR દાખલ કરવામાં આવી

પશ્ચિમ બંગાળના ભૂતપૂર્વ મુખ્યમંત્રી અને તૃણમૂલ સુપ્રીમો મમતા બેનર્જીની કાનૂની મુશ્કેલીઓ વધી ગઈ છે. સિલિગુડી સાયબર ક્રાઈમ પોલીસ સ્ટેશનમાં તેમના વિરુદ્ધ દેશ વિરોધી ટિપ્પણી કરવાનો આરોપ લગાવીને વધુ એક FIR દાખલ કરવામાં આવી છે. વકીલ રિંકી સેન ચેટર્જીએ પૂર્વ મુખ્યમંત્રી વિરુદ્ધ દેશ વિરોધી ટિપ્પણી કરવા બદલ ફરિયાદ નોંધાવી હતી. તેમના મતે, મમતા બેનર્જીએ બાંગ્લાદેશમાં ઉસ્માન હાદીની હત્યા અંગે દેશના ગૃહ મંત્રાલય વિરુદ્ધ ભડકાઉ ટિપ્પણીઓ કરી હતી. તેમણે બંને દેશો વચ્ચે સંઘર્ષની પરિસ્થિતિ ઉભી કરી હતી.

આ વિવાદ 2 જૂન, 2026 ના રોજ કોલકાતાના ધર્મતલામાં ટીએમસીના વિરોધ પ્રદર્શન દરમિયાન શરૂ થયો હતો. ભૂતપૂર્વ મુખ્યમંત્રી મમતા બેનર્જીએ પોતાના ભાષણમાં દાવો કર્યો હતો કે તેઓ બાંગ્લાદેશમાં થયેલી એક મોટી હત્યાની સંપૂર્ણ વિગતો અને તેમાં સામેલ લોકોના નામ જાણે છે, પરંતુ તેઓ તેનો ખુલાસો નહીં કરે કારણ કે તેનાથી પડોશી દેશમાં હોબાળો થઈ શકે છે. તેઓ સ્પષ્ટપણે બાંગ્લાદેશી વિદ્યાર્થી નેતા ઉસ્માન બિન હાદીની હત્યાનો ઉલ્લેખ કરી રહ્યા હતા. તેમણે ઉસ્માન હાદીની હત્યાનો ઉલ્લેખ કરતી કેટલીક ટિપ્પણીઓ કરી હતી, જેમાં કેન્દ્રીય ગૃહ મંત્રાલય અને કેન્દ્રીય ગૃહમંત્રી અમિત શાહની ભૂમિકા તરફ ઈશારો કરવામાં આવ્યો હતો.