ફોરેસ્ટ અને પોલીસ ટીમ પર હુમલો કરી સરકારી મિલકતને નુકસાન પહોંચાડવાના ગુનામાં અંબાજીથી ઝડપાયા છ આરોપી
અંબાજી પોલીસ સ્ટેશન વિસ્તારમાં આવેલા પાડલીયા ગામે ફોરેસ્ટ અને પોલીસની ટીમ ઉપર હુમલો કરી સરકારી મિલકતને નુકસાન પહોંચાડવા ના ગુનામાં છેલ્લા એક વર્ષથી નાસતા-ફરતા છ આરોપીઓને પાલનપુર એલ.સી.બી.ની ટીમે ઝડપી પાડ્યા છે.
એલ.સી.બી.ના હેડ કોન્સ્ટેબલ પુંજાભાઈ નાથાભાઈ તથા પોલીસ કોન્સ્ટેબલ ઈશ્વરભાઈ ભીખાભાઈને મળેલી બાતમીના આધારે માનવસ્રોત અને ટેકનિકલ માહિતીના આધારે કાર્યવાહી કરવામાં આવી હતી. જેમાં હોનાભાઈ સોમાભાઈ ડુગાસીયા, દિનેશકુમાર અર્જુનભાઈ અંગારી, જોનાભાઈ ઉર્ફે ગેનાભાઈ સોમાભાઈ ભગોરા, સવાભાઈ ભાણાભાઈ ભગોરા, મંજીરા ઉર્ફે મંહુરાભાઈ અરજણભાઈ ભગોરા અને ભોમાભાઈ કેશાભાઈ પરમાર, તમામ રહે. પાડલીયા, તા. દાંતાને અંબાજી ખાતેથી ઝડપી પાડવામાં આવ્યા હતા. ઝડપાયેલા તમામ આરોપીઓ ને વધુ કાર્યવાહી માટે અંબાજી પોલીસ મથકને સોંપવામાં આવ્યા છે.
