કેન્યામાં હેલિકોપ્ટર ક્રેશ, 5 અમેરિકી નાગરિકો સહિત 7 લોકોના મોત

બુધવારે સવારે ઉત્તર કેન્યાના એક દૂરના વિસ્તારમાં એક હેલિકોપ્ટર ક્રેશ થયું . પાંચ અમેરિકન નાગરિકો સહિત સાત લોકોના મોત થયા. ઘટનાની વધુ વિગતો આપતા કેન્યા સિવિલ એવિએશન ઓથોરિટીએ જણાવ્યું હતું કે હેલિકોપ્ટર સવારે 9:13 વાગ્યે લોઈસાબા કન્ઝર્વેશન એરિયાથી સંબુરુ કાઉન્ટીના ઇવાસો નાયરો વિસ્તાર તરફ ઉડાન ભરતી વખતે ક્રેશ થયું હતું. હેલિકોપ્ટરમાં પાઇલટ સહિત સાત લોકો સવાર હતા. અકસ્માતની તપાસ કરવામાં આવી રહી છે. 

સામ્બુરુ પોલીસ કમાન્ડર ડેવિડ નકોરોઈએ બુધવારે મોડી રાત્રે મીડિયાને જણાવ્યું હતું કે હેલિકોપ્ટરમાં સવાર તમામ સાત લોકો અકસ્માતમાં મૃત્યુ પામ્યા હતા. વોશિંગ્ટનમાં યુએસ સ્ટેટ ડિપાર્ટમેન્ટે જણાવ્યું હતું કે મૃતકોમાંથી પાંચ અમેરિકન નાગરિક હતા.  મૃતકોની ઓળખ હજુ સુધી જાહેર કરવામાં આવી નથી. જોકે, ફ્લોરિડા (યુએસએ) ના મિયામીમાં કાર્યરત એક સ્થાનિક ટેલિવિઝન સ્ટેશને અહેવાલ આપ્યો છે કે મૃતકોમાં NBCUniversal ની માલિકીના સ્પેનિશ ભાષાના ટેલિવિઝન નેટવર્ક, ટેલિમુન્ડોના ચેનલોના પ્રમુખ અને જનરલ મેનેજર જોસ સુઆરેઝ (55) પણ હતા. 

સ્થાનિક મીડિયા અહેવાલો અનુસાર, હેલિકોપ્ટર દેશના લોકપ્રિય પર્યટન સ્થળ માઉન્ટ ઓલોલોક્વેની તળેટીમાં એક દૂરના વિસ્તારમાં ક્રેશ થયું હતું. સ્થાનિક કંપની લેડી લોરી હેલિકોપ્ટર્સ દ્વારા સંચાલિત આ હેલિકોપ્ટર ટ્રાવેલ કંપની બિયોન્ડના મહેમાનોને લઈ જઈ રહ્યું હતું.