સ્વિટ્ઝર્લૅન્ડમાં અમેરિકા-ઈરાન બેઠક યોજાશે, પાકિસ્તાનના ગૃહમંત્રી તેહરાન પહોંચ્યા

ઈરાન અને અમેરિકા વચ્ચે ચાલી રહેલા તણાવ વચ્ચે આ અઠવાડિયે યુદ્ધવિરામની જાહેરાત કરવામાં આવી હતી. આ મામલે આગામી બેઠક હવે સ્વિટ્ઝર્લૅન્ડમાં યોજાવાની છે. અમેરિકા તરફથી જેરેડ કુશનર અને સ્ટીવ વિટકોફ પહેલેથી જ આ બેઠક માટે સ્વિટ્ઝર્લૅન્ડમાં હાજર છે. આ માહિતી અમેરિકાના ઉપપ્રમુખ જેડી વાન્સે આપી હતી. આ દરમિયાન, ઈરાનથી વાટાઘાટકારોની એક ટીમ પણ સ્વિટ્ઝર્લૅન્ડ જવા રવાના થઈ ગઈ છે. આ સમગ્ર ઘટના વચ્ચે, પાકિસ્તાનના ગૃહમંત્રી મોહસીન નકવી ઈરાન પહોંચી ગયા છે. નોંધનીય છે કે ઈરાને તાજેતરમાં જ ઇઝરાયલ પર યુદ્ધવિરામના નિયમોનું પાલન ન કરવાનો આરોપ લગાવતા હોર્મુઝ સ્ટ્રેટને ફરીથી બંધ કરવાની જાહેરાત કરી છે. 

ઈરાનના સરકારી ટેલિવિઝનનું કહેવું છે કે યુદ્ધ અંગેના વચગાળાના કરાર પર યુનાઇટેડ સ્ટેટ્સ સાથે વાટાઘાટો કરવા માટે એક ટીમ સ્વિટ્ઝર્લૅન્ડ જઈ રહી છે. પ્રસારણકર્તાએ શનિવારે તેના અહેવાલમાં વિદેશ મંત્રાલયના પ્રવક્તાને ટાંકીને જણાવ્યું હતું. આ મુલાકાત મૂળ શુક્રવારે થવાની હતી પરંતુ તેને રદ કરવામાં આવી હતી. ઈરાનના સંયુક્ત લશ્કરી કમાન્ડ દ્વારા લેબનોનમાં સતત ઇઝરાયલી હુમલાઓને કારણે હોર્મુઝ સ્ટ્રેટ ફરીથી બંધ કરવામાં આવ્યાના થોડા સમય પછી આ નવી જાહેરાત કરવામાં આવી છે. વિદેશ મંત્રાલયના પ્રવક્તા ઇસ્માઇલ બાઘેઈએ રાજ્ય ટીવીને જણાવ્યું હતું કે કોઈપણ મેમોરેન્ડમ અથવા કરારની વાસ્તવિક કસોટી ત્યારે થાય છે જ્યારે તે અમલીકરણ તબક્કામાં પ્રવેશ કરે છે.

દરમિયાન, ઈરાન અને અમેરિકા વચ્ચે યુદ્ધવિરામ અંગે, પાકિસ્તાન કહે છે કે ઈરાન અને અમેરિકા વચ્ચે તેમના વચગાળાના કરાર પર ટેકનિકલ સ્તરની વાટાઘાટો રવિવારે સ્વિટ્ઝર્લૅન્ડના બર્જેનસ્ટોકમાં શરૂ થશે, જેમાં કતારી મધ્યસ્થી પણ સામેલ થશે. તમને જણાવી દઈએ કે વોશિંગ્ટનમાં, ઉપપ્રમુખ જેડી વાન્સે શનિવારે પુષ્ટિ આપી હતી કે ટોચના યુએસ વાટાઘાટકારો - જેરેડ કુશનર અને સ્ટીવ વિટકોફ - પહેલેથી જ સ્વિટ્ઝર્લૅન્ડમાં છે અને ઈરાનના પરમાણુ કાર્યક્રમ પર વાટાઘાટોની ટેકનિકલ વિગતો પર કામ કરી રહ્યા છે. વાન્સે એક મુલાકાતમાં કહ્યું હતું કે તેઓ અપેક્ષા રાખે છે કે તેઓ આગામી થોડા દિવસોમાં ક્યારેક સ્વિટ્ઝર્લૅન્ડ જશે, પરંતુ તેમણે સ્વીકાર્યું કે તે હંમેશા એક નાજુક સંકલન પ્રક્રિયા છે.