પાકિસ્તાન માટે જાસૂસી કરવાના આરોપમાં નૌકાદળના કર્મચારી સહિત બે લોકોની ધરપકડ

આંધ્રપ્રદેશ પોલીસે પાકિસ્તાન માટે જાસૂસી કરવાના આરોપસર નૌકાદળના કર્મચારી સહિત બે લોકોની ધરપકડ કરી છે . આ કેસમાં ૧૮ શંકાસ્પદોમાંથી મોટાભાગના નૌકાદળ સાથે સંકળાયેલા છે. અધિકારીઓએ જણાવ્યું હતું કે 18 શંકાસ્પદોમાંથી 13 નૌકાદળના કર્મચારીઓ છે જેઓ રાષ્ટ્રીય સુરક્ષાને જોખમમાં મૂકતા જાસૂસી કાવતરામાં સામેલ હતા.

મંગળવારે આંધ્રપ્રદેશ પોલીસ વિભાગ દ્વારા જારી કરાયેલા એક સત્તાવાર નિવેદન અનુસાર, પોલીસે વિશાખાપટ્ટનમ નેવી બેઝના કર્મચારી પ્રદીપ મુખર્જી અને વિશાખાપટ્ટનમમાં નેવી અધિકારીઓ માટે કામ કરતા કોન્ટ્રાક્ટ ડ્રાઇવર અન્નમ સાઈ વરપ્રસાદની ધરપકડ કરી હતી. નિવેદનમાં કહેવામાં આવ્યું છે કે, "આંધ્રપ્રદેશ કાઉન્ટર ઇન્ટેલિજન્સ સેલને કેટલાક વ્યક્તિઓ વિશે વિશ્વસનીય માહિતી મળી હતી જેઓ કથિત રીતે પાકિસ્તાન ઇન્ટેલિજન્સ ઓપરેટિવ્સ (PIO) સાથે સીધા સંપર્કમાં હતા અને જાસૂસી ષડયંત્રમાં સામેલ હતા જે ભારતની રાષ્ટ્રીય સુરક્ષા માટે ખતરો હતો."

"આ કેસમાં શરૂઆતમાં બે શંકાસ્પદોની ભૂમિકા સ્થાપિત થયા પછી તેમની ધરપકડ કરવામાં આવી છે, અને બાકીના શંકાસ્પદોની વધુ તપાસ ચાલી રહી છે," એમ તેમાં જણાવાયું છે. પ્રદીપ મુખર્જીને તાજેતરમાં તમિલનાડુના કોઈમ્બતુરથી ધરપકડ કરવામાં આવી હતી. તેમને વિજયવાડા કોર્ટમાં રજૂ કરવામાં આવ્યા હતા અને 14 ઓક્ટોબર સુધી ન્યાયિક કસ્ટડીમાં મોકલવામાં આવ્યા હતા. તેઓ હાલમાં વિજયવાડા જિલ્લા જેલમાં બંધ છે. તેવી જ રીતે, અન્નમ સાઈ વરપ્રસાદને પણ 14 ઓક્ટોબર સુધી ન્યાયિક કસ્ટડીમાં મોકલવામાં આવ્યા હતા અને તે જ જેલમાં બંધ છે.