ICC દ્વારા નવીનતમ રેન્કિંગ જાહેર કરવામાં આવી છે, જેમાં સ્ટાર ભારતીય ખેલાડી દીપ્તિ શર્માને મોટું નુકસાન થયું છે. દીપ્તિ શર્માએ નંબર-1 નું સ્થાન ગુમાવ્યું છે. ICC મહિલા T20I બોલરોના રેન્કિંગમાં, દીપ્તિ શર્મા એક સ્થાન ગુમાવ્યા પછી ટોચ પરથી બીજા સ્થાને સરકી ગઈ છે. દીપ્તિ શર્માના એક સ્થાન નીચે સરકી જવાને કારણે, ઓસ્ટ્રેલિયાની સ્ટાર ખેલાડી એનાબેલ સધરલેન્ડ T20I બોલિંગ રેન્કિંગમાં નંબર 1 નું સ્થાન પાછી મેળવી છે અને તેનું રેટિંગ (736) એ જ છે જે તેણે ઓગસ્ટ 2025 માં પહેલી વાર ટોચનું સ્થાન મેળવ્યું હતું. શ્રીલંકા સામેની પાંચ મેચની T20I શ્રેણીની અંતિમ મેચમાં ભારતની 15 રનની જીત બાદ જારી કરાયેલા નવીનતમ રેન્કિંગમાં એનાબેલ સધરલેન્ડે નોંધપાત્ર સુધારો કર્યો છે. જ્યારે સધરલેન્ડે ટોચનું સ્થાન પાછું મેળવ્યું છે, ત્યારે તેના અને દીપ્તિ શર્માના રેટિંગ પોઈન્ટ વચ્ચે ફક્ત એક પોઈન્ટનો તફાવત છે. તેથી, આગામી દિવસોમાં રેન્કિંગમાં બે ખેલાડીઓ વચ્ચે જોરદાર ટક્કર થવાની અપેક્ષા છે. ICC મહિલા T20I બોલરોના રેન્કિંગમાં પાકિસ્તાનની સાદિયા ઇકબાલ ત્રીજા સ્થાને છે. ઇંગ્લેન્ડની બોલરો સોફી એક્લેસ્ટોન અને લોરેન બેલ અનુક્રમે ચોથા અને પાંચમા સ્થાને યથાવત છે. જોકે, દીપ્તિ શર્માની જેમ, ભારતીય બોલર રેણુકા સિંહ ઠાકુરને પણ મોટો નુકસાન સહન કરવો પડ્યો છે. રેણુકા સિંહ પાંચ સ્થાન નીચે ઉતરી ગઈ છે અને ટોપ 10 માંથી બહાર થઈ ગઈ છે. રેણુકા સાતમા સ્થાનેથી 11મા સ્થાને સરકી ગઈ છે. દીપ્તિ શર્મા અને રેણુકા સિંહને રેન્કિંગમાં નુકસાન થયું છે, જ્યારે ભારતીય કેપ્ટન હરમનપ્રીત કૌરનો ક્રમાંક વધ્યો છે. શ્રીલંકા સામે તિરુવનંતપુરમમાં ઘરઆંગણે રમાયેલી પાંચમી અને અંતિમ ટી20Iમાં મેચ જીતનારી ઇનિંગ રમ્યા બાદ હરમનપ્રીત કૌર ICC મહિલા T20I બેટિંગ રેન્કિંગમાં બે સ્થાન ઉપર ચઢીને 13મા સ્થાને પહોંચી ગઈ છે. જેમીમા રોડ્રિગ્સ બે સ્થાન નીચે ઉતરીને 12મા સ્થાને સરકી ગઈ છે. ઓસ્ટ્રેલિયાની શક્તિશાળી બેટ્સમેન એલિસા હીલી ટોપ-10માં પ્રવેશી છે. તેણીને એક સ્થાનનો ફાયદો થયો છે. ટોપ-10 બેટ્સમેનોમાં ફક્ત બે ભારતીય બેટ્સમેનનો સમાવેશ થાય છે. સ્મૃતિ મંધાના ત્રીજા સ્થાને છે જ્યારે શેફાલી વર્મા છઠ્ઠા સ્થાને છે.
ICC રેન્કિંગમાં સ્ટાર ભારતીય ખેલાડીએ નંબર 1 સ્થાન ગુમાવ્યું, ઓસ્ટ્રેલિયન બોલર ટોચ પર
