ઓનલાઈન રેલ્વે ટિકિટ બુકિંગમાં અનિયમિતતાની ફરિયાદો દરરોજ આવતી રહે છે. આને રોકવા માટે, ભારતીય રેલ્વેએ એક મોટું પગલું ભર્યું છે. રેલવેએ ૨.૫ કરોડથી વધુ IRCTC વપરાશકર્તાઓના ID બંધ કરી દીધા છે. ડેટાનું વિશ્લેષણ કરતી વખતે, રેલવેને કેટલાક વપરાશકર્તાઓના બુકિંગ પેટર્ન અંગે શંકા ગઈ. આ શંકાના આધારે, આ વપરાશકર્તાઓના આઈડી બંધ કરી દેવામાં આવ્યા છે. સરકારે સંસદમાં એક પ્રશ્નના જવાબમાં આ માહિતી આપી.
સાંસદ એ.ડી.સિંહે સંસદમાં આ અંગે પ્રશ્ન પૂછ્યો હતો. તેમણે પૂછ્યું કે કરોડો IRCTC વપરાશકર્તાઓના ID શા માટે બ્લોક કરવામાં આવ્યા છે, ટિકિટ બુકિંગ ખુલતાની સાથે જ ટિકિટ કેવી રીતે ગાયબ થઈ જાય છે અને રેલવે આને રોકવા માટે કયા પગલાં લઈ રહી છે? આના જવાબમાં સરકારે માહિતી આપી. સરકારે કહ્યું કે ટિકિટ બુકિંગમાં થતી અનિયમિતતાઓને રોકવા માટે, IRCTC એ ૨.૫ કરોડથી વધુ યુઝર આઈડી બંધ કરી દીધા છે. તપાસમાં જાણવા મળ્યું કે આ યુઝર આઈડી દ્વારા બુકિંગ કરવામાં કંઈક ખોટું હતું.
રેલવેએ એમ પણ કહ્યું કે ટ્રેન ટિકિટની માંગ આખા વર્ષ દરમિયાન એકસરખી રહેતી નથી. કયારેક ટિકિટની માંગ ખૂબ વધારે હોય છે અને કયારેક ઓછી હોય છે. જે ટ્રેનો વધુ લોકપ્રિય છે અને ઓછો મુસાફરી સમય લે છે તેની ટિકિટો ઝડપથી વેચાઈ જાય છે. પરંતુ અન્ય ટ્રેનોની ટિકિટ સરળતાથી મળી રહે છે. મુસાફરોને કન્ફર્મ ટિકિટ સરળતાથી મળે, ટિકિટ બુકિંગમાં પારદર્શિતા આવે અને વધુને વધુ લોકો ઓનલાઈન ટિકિટ બુક કરાવે તે માટે રેલવેએ અનેક પગલાં લીધાં છે.
તમે ઓનલાઈન અથવા રેલ્વે કાઉન્ટરની મુલાકાત લઈને ટિકિટ બુક કરી શકો છો. આજકાલ લગભગ ૮૯% ટિકિટ ઓનલાઈન બુક થાય છે. તમે રેલ્વે કાઉન્ટર પર ડિજિટલ રીતે પણ ચુકવણી કરી શકો છો. ૧ જુલાઈ, ૨૦૨૫ થી, તત્કાલ ટિકિટ બુકિંગના નિયમોમાં કેટલાક ફેરફારો કરવામાં આવ્યા છે. હવે તમારે IRCTC વેબસાઇટ અથવા એપ પર આધાર કાર્ડથી વેરિફિકેશન કરાવવું પડશે. તત્કાલ ટિકિટ બુકિંગ શરૃ થયાના પહેલા ૩૦ મિનિટ સુધી એજન્ટો ટિકિટ બુક કરી શકશે નહીં.
