ઉત્તર-મધ્ય નાઇજીરીયામાં એક મોટી બોટ દુર્ઘટના બની છે. બોટ નદીમાં ઝાડની ડાળી સાથે અથડાઈ અને ઊંડા પાણીમાં ડૂબી ગઈ. આ જળ દુર્ઘટનામાં ઓછામાં ઓછા 31 લોકોના મોત થયા છે, જ્યારે ઘણા લોકો ગુમ થયાના અહેવાલ છે. બચાવ ટીમ ઘટનાસ્થળે પહોંચી ગઈ છે અને રાહત અને બચાવ કામગીરી શરૂ કરી દીધી છે. અધિકારીઓએ બુધવારે આ માહિતી આપી હતી. નાઇજીરીયાની રાષ્ટ્રીય કટોકટી વ્યવસ્થાપન એજન્સીના અધિકારી હુસૈની ઇસાહે એસોસિએટેડ પ્રેસને જણાવ્યું હતું કે નાઇજર રાજ્યના બોર્ગુ વિસ્તારમાં ઓવરલોડેડ બોટ એક ઝાડના થડ સાથે અથડાઈ હતી. બોટમાં લગભગ 90 લોકો સવાર હતા. ઇસાહે જણાવ્યું હતું કે અત્યાર સુધીમાં 50 લોકોને બચાવી લેવામાં આવ્યા છે, પરંતુ ગુમ થયેલા લોકોની ચોક્કસ સંખ્યા હજુ સુધી જાણી શકાઈ નથી, કારણ કે શોધ અને બચાવ કામગીરી હજુ પણ ચાલુ છે. નાઇજીરીયાના દૂરના વિસ્તારોમાં વરસાદની ઋતુમાં બોટ અકસ્માતો સામાન્ય છે. આ અકસ્માતોના મુખ્ય કારણોમાં વધુ પડતો ભાર, નબળી જાળવણી અને સલામતીના પગલાંનો અભાવ છે. વિશ્લેષકો કહે છે કે આમાંની ઘણી બોટ લાઇફ જેકેટ વિના ચાલે છે. ગયા મહિને પણ દેશના ઉત્તરપશ્ચિમ સોકોટો રાજ્યમાં બોટ પલટી જવાથી 25 લોકો ગુમ થયા હતા.
નાઇજીરીયામાં બોટ ડૂબી જવાથી ઓછામાં ઓછા 31 લોકોના મોત
