અમેરિકાના રાષ્ટ્રપ્રમુખ ડોનાલ્ડ ટ્રમ્પના આદેશ બાદ યમનના ઈરાન સમર્થિત હૂથીઓ પર મોટાપાયે સૈન્ય હુમલો

(જી.એન.એસ) તા.16

વોશિંગ્ટન,

અમેરિકી રાષ્ટ્રપતિ ડોનાલ્ડ ટ્રમ્પના આદેશ પર યમનના હુથી બળવાખોરો સામે લશ્કરી હુમલો કરવામાં આવ્યો હતો, આમાં યમનના 9 લોકો મૃત્યુ પામ્યા છે. હુથી બળવાખોર જૂથે લાલ સમુદ્રમાં શિપિંગ સામે હુમલા કર્યા હતા. અમેરિકાએ ચેતવણી આપી હતી કે જો હુથીઓ તેમનું અભિયાન બંધ નહીં કરે તો કાર્યવાહી કરવામાં આવશે. ટ્રમ્પે હુથીઓના મુખ્ય સમર્થક ઈરાનને પણ ચેતવણી આપી હતી કે તેણે તાત્કાલિક આ જૂથને ટેકો આપવાનું બંધ કરી દેવું જોઈએ.

ડોનાલ્ડ ટ્રમ્પે ઈરાનને સંબોધતા કહ્યું, “જો તમે અમેરિકાને ધમકી આપો છો, તો અમેરિકા તમને સંપૂર્ણપણે જવાબદાર ઠેરવશે અને અમે તેને દયાથી નહીં લઈએ.” હુથી સંચાલિત આરોગ્ય મંત્રાલયના જણાવ્યા અનુસાર, યમનના સના પર યુએસ હુમલામાં નવ નાગરિકો માર્યા ગયા અને નવ ઘાયલ થયા. “15 માર્ચે, યુએસ સેન્ટ્રલ કમાન્ડે યમનમાં ઈરાન સમર્થિત હુથી ટાર્ગેટ પર અમેરિકાના હિતોનું રક્ષણ કરવા, વિરોધીઓને રોકવા અને નોવહનની સ્વતંત્રતા પુનઃસ્થાપિત કરવા માટે અનેક કાર્યવાહી શરૂ કરી, જેમાં ચોકસાઈભર્યા હુમલાઓનો સમાવેશ થાય છે,” યુએસ સેન્ટ્રલ કમાન્ડે એક સોશિયલ મીડિયા પોસ્ટમાં જણાવ્યું હતું.

હૂથીના પ્રવક્તા મોહમ્મદ અબ્દુલ સલામે અમેરિકાના દાવાને ખોટો ઠેરવતાં નિવેદન આપ્યું હતું કે, ‘અમેરિકા આ હુમલાની મદદથી આંતરરાષ્ટ્રીય સ્તરે લોકોના મંતવ્યોને ગેરમાર્ગે દોરવાનો પ્રયાસ કરી રહ્યા છે. તેમજ બાબ અલ-મંદબ સ્ટ્રેટમાં ઈન્ટરનેશનલ શિપિંગને પ્રભાવિત કરી રહ્યા છે. યમન દ્વારા કરવામાં આવેલી દરિયાઈ નાકાબંધી માત્ર ઈઝરાયલ નેવી શિપ્સ સુધી મર્યાદિત છે. તેનો હેતુ ગાઝાના લોકો સુધી માનવીય સહાય પહોંચાડવાનો છે.’