વિરાટ કોહલીનો વધુ એક ધમાકો, રન ચેઝમાં રિકી પોન્ટિંગને પાછળ છોડી દીધો

તિરુવનંતપુરમમાં રમાયેલી પહેલી વનડેમાં ભારતે વેસ્ટ ઈન્ડિઝને 8 વિકેટથી હરાવ્યું હતું. વેસ્ટ ઈન્ડિઝે ભારતને 296 રનનો લક્ષ્યાંક આપ્યો હતો, જે ભારતીય ટીમે વિરાટ કોહલી અને શુભમન ગિલની શાનદાર સદીઓને કારણે સરળતાથી પ્રાપ્ત કરી લીધો હતો. વિરાટ કોહલીએ આ મેચમાં શાનદાર બેટિંગ કરતા માત્ર 88 બોલમાં 10 ચોગ્ગા અને 9 છગ્ગા સહિત 139 રન બનાવ્યા હતા . આ મેચવિનિંગ ઇનિંગ સાથે, વિરાટ કોહલીએ રિકી પોન્ટિંગને એક ખાસ રેકોર્ડ યાદીમાં પાછળ છોડી દીધો.

વિરાટ કોહલી 112 વખત રનનો પીછો કરતી વખતે ભારતની ODI જીતનો ભાગ રહ્યો છે, જ્યારે પોન્ટિંગ ફક્ત 111 વખત જ આવું કરી શક્યો છે. સચિન તેંડુલકર રનનો પીછો કરતી વખતે 127 જીત સાથે યાદીમાં ટોચ પર છે. બીજા ક્રમે ભૂતપૂર્વ ભારતીય કેપ્ટન મહેન્દ્ર સિંહ ધોની છે, જેમણે રનનો પીછો કરતી વખતે ભારતને 116 જીત અપાવી હતી. વિરાટ કોહલી હવે 112 જીત સાથે ત્રીજા સ્થાને છે, જ્યારે પોન્ટિંગ ચોથા સ્થાને સરકી ગયો છે. દક્ષિણ આફ્રિકાના જેક્સ કાલિસ અને ભારતના રોહિત શર્મા (110 જીત) સંયુક્ત રીતે પાંચમા સ્થાને છે. વિરાટ પોન્ટિંગને પાછળ છોડી ચૂક્યો છે, તેમ છતાં તે સચિન અને ધોનીનો રેકોર્ડ તોડવામાં હજુ પણ પાછળ છે.

મેચની વાત કરીએ તો, ભારતીય કેપ્ટન શુભમન ગિલે ટોસ જીતીને પ્રથમ બોલિંગ કરવાનો નિર્ણય લીધો. પ્રથમ બેટિંગ કરતા, વેસ્ટ ઇન્ડીઝે નિર્ધારિત ઓવરમાં 7 વિકેટ ગુમાવીને 295 રન બનાવ્યા. જવાબમાં ભારતે સારી શરૂઆત કરી, જોકે રોહિત શર્મા 32 રન બનાવીને આઉટ થયો. ત્યારબાદ, શુભમન ગિલ અને વિરાટ કોહલીએ ઇનિંગ્સને સ્થિર કરી અને ટીમને મજબૂત સ્થિતિમાં લાવી. ગિલે શાનદાર બેટિંગ કરી, 96 બોલમાં 110 રન બનાવ્યા, જેમાં 12 ચોગ્ગા અને 1 છગ્ગાનો સમાવેશ થાય છે. ગિલના આઉટ થયા પછી, કોહલીએ પણ આક્રમક સદી ફટકારી, અને ભારતે 42મી ઓવરમાં મેચ જીતીને શ્રેણીમાં 1-0ની લીડ મેળવી છે.