અમેરિકા બાદ હવે રશિયન બોમ્બર વિમાન ક્રેશ થયું, સાઇબિરીયાના જંગલોમાં પડ્યું

અમેરિકા બાદ, હવે એક રશિયન Tu-22M3 બોમ્બર ક્રેશ થયું છે. રશિયન સંરક્ષણ મંત્રાલયે જણાવ્યું હતું કે સોમવારે સાઇબિરીયાના ઇર્કુત્સ્ક ક્ષેત્રમાં તાલીમ ઉડાન દરમિયાન રશિયન Tu-22M3 વ્યૂહાત્મક બોમ્બર વિમાન ક્રેશ થયું હતું. પાઇલટ અને ચાર સભ્યોના ક્રૂ સમયસર સુરક્ષિત રીતે બહાર નીકળી ગયા હતા. રશિયન બોમ્બર ક્રેશમાં કોઈનું મોત થયું નથી.

હાઇપરસોનિક કિંજલ મિસાઇલો વહન કરવામાં સક્ષમ Tu-22 ને નાટો દ્વારા "બેકફાયર" કોડનેમ આપવામાં આવ્યું હતું. તે સોવિયેત યુગનું સુપરસોનિક બોમ્બર વિમાન છે. રશિયાએ સીરિયા અને યુક્રેનના યુદ્ધોમાં પણ તેનો ઉપયોગ કર્યો છે. રશિયન Tu-22M3 બોમ્બર ક્રેશના ઘણા વીડિયો સોશિયલ મીડિયા પર ફરતા થઈ રહ્યા છે. એક વીડિયોમાં વિમાન અંગારા નદીના કિનારે એક ગીચ જંગલ વિસ્તારમાં ડૂબકી લગાવતું દેખાય છે. થોડીવારમાં જ વિમાન જંગલ વિસ્તારમાં ડૂબી ગયું, ત્યારબાદ ધુમાડાના ગોટા દેખાયા હતા.