હિમાચલ પ્રદેશમાં વરસાદે તબાહી મચાવી, 69 લોકોના મોત

હિમાચલ પ્રદેશમાં ચોમાસાની શરૂઆત સાથે જ ભારે વરસાદ અને આફતોએ તબાહી મચાવી દીધી છે. મુખ્યમંત્રી સુખવિંદર સિંહ સુખુએ શુક્રવારે જણાવ્યું હતું કે ચોમાસાની શરૂઆતથી અત્યાર સુધીમાં 69 લોકોએ જીવ ગુમાવ્યા છે, 37 ગુમ થયા છે અને 110 ઘાયલ થયા છે. આ ઉપરાંત, રાજ્યમાં લગભગ 700 કરોડ રૂપિયાનું નુકસાન થયું હોવાનો અંદાજ છે. મુખ્યમંત્રીએ કહ્યું, 'વરસાદની શરૂઆતથી રસ્તાઓ, પાણી પ્રોજેક્ટ્સ, વીજળી લાઇનો અને થાંભલાઓને ભારે નુકસાન થયું છે. વીજળીના થાંભલા ઉખડી ગયા છે, જેના કારણે વીજળી પુરવઠા પર ખરાબ અસર પડી છે. સુખુએ કહ્યું કે આ વર્ષે હિમાચલમાં ચોમાસાની શરૂઆતમાં જ ભારે વિનાશ થયો છે. તેમણે આ સંદર્ભમાં કેન્દ્રીય ગૃહમંત્રી અમિત શાહ સાથે વાત કરી, જેમણે રાજ્યને શક્ય તમામ મદદની ખાતરી આપી છે. મુખ્યમંત્રીએ કહ્યું, 'મેં આજે ગૃહમંત્રી સાથે વાત કરી. તેમણે કહ્યું કે કેન્દ્ર સરકાર અમને સંપૂર્ણ મદદ કરશે. નુકસાનનો અંદાજ કાઢવા માટે કેન્દ્રીય ટીમ પણ આજે હિમાચલ પહોંચી રહી છે.' મુખ્યમંત્રીએ એમ પણ કહ્યું કે રાજ્યમાં 14 સ્થળોએ વાદળ ફાટવાની ઘટનાઓ નોંધાઈ છે. તેમણે કહ્યું, 'અમે અભ્યાસ કરી રહ્યા છીએ કે વાદળ ફાટવાની ઘટનાઓ આટલી બધી કેમ બની રહી છે.