અમેરિકા સાથેના વેપાર કરાર પર મોટી અપડેટ, પિયુષ ગોયલે આપી આ મહત્વપૂર્ણ માહિતી

કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે બુધવારે જણાવ્યું હતું કે ભારત વેપાર કરાર માટે અમેરિકા સાથે સક્રિય રીતે વાટાઘાટો કરી રહ્યું છે. ગોયલે કહ્યું કે રાષ્ટ્રીય રાજધાની દિલ્હીમાં વેપાર કરાર માટે યુરોપિયન યુનિયન સાથે પણ વાટાઘાટો ચાલી રહી છે. આ ઉપરાંત, ભારત ન્યુઝીલેન્ડ સાથે પણ વેપાર કરાર માટે વાટાઘાટો કરી રહ્યું છે. ઉદ્યોગ સંગઠન FICCI ના એક કાર્યક્રમમાં ગોયલે કહ્યું, "અમે અમેરિકા અને ન્યુઝીલેન્ડ સાથે વેપાર કરાર માટે સક્રિય રીતે વાટાઘાટો કરી રહ્યા છીએ." કેન્દ્રીય મંત્રીએ કહ્યું કે ભારતે પહેલાથી જ મોરેશિયસ, સંયુક્ત આરબ અમીરાત (UAE) અને ઓસ્ટ્રેલિયા સાથે વેપાર કરારો પર હસ્તાક્ષર કર્યા છે. આ સાથે, કેન્દ્રીય મંત્રી ગોયલે કહ્યું, "અમે ટૂંક સમયમાં ઓસ્ટ્રેલિયા સાથે વેપાર કરારના બીજા તબક્કાને અંતિમ સ્વરૂપ આપીશું." તમને જણાવી દઈએ કે યુએસ રાષ્ટ્રપતિ ડોનાલ્ડ ટ્રમ્પે મંગળવારે કહ્યું હતું કે તેમને વિશ્વાસ છે કે ભારત અને અમેરિકા વચ્ચે વેપાર વાટાઘાટોના સફળ નિષ્કર્ષ પર પહોંચવામાં કોઈ મુશ્કેલી નહીં પડે અને તેઓ ટૂંક સમયમાં તેમના સારા મિત્ર વડા પ્રધાન નરેન્દ્ર મોદી સાથે વાત કરશે. આને ભારત અને અમેરિકા વચ્ચે દ્વિપક્ષીય સંબંધોમાં સુધારાના સંકેત તરીકે જોવામાં આવી રહ્યું છે. મંગળવારે ટ્રુથ સોશિયલ પર એક પોસ્ટમાં ડોનાલ્ડ ટ્રમ્પે કહ્યું કે તેમને એ જણાવતા આનંદ થાય છે કે ભારત અને અમેરિકા વચ્ચેના વેપાર કરારમાં રહેલા અવરોધોને દૂર કરવા માટે વાતચીત ચાલી રહી છે. તેમણે કહ્યું, "હું આગામી અઠવાડિયામાં મારા શ્રેષ્ઠ મિત્ર, વડા પ્રધાન મોદી સાથે વાત કરવા માટે ઉત્સુક છું. તમને જણાવી દઈએ કે અમેરિકા દ્વારા ટેરિફ લાદવા અને ભારત દ્વારા રશિયા પાસેથી તેલની ખરીદીને કારણે બંને દેશો વચ્ચેના સંબંધો બે દાયકાના સૌથી ખરાબ તબક્કામાંથી પસાર થઈ રહ્યા છે. ટ્રમ્પે ભારત પર 25 ટકા ટેરિફ અને રશિયન તેલની ખરીદી માટે વધારાનો 25 ટકા ટેરિફ લાદ્યો છે. આનાથી ભારત પર કુલ યુએસ ટેરિફ 50 ટકા થઈ ગયો છે, જે વિશ્વમાં સૌથી વધુ છે.