રાઉરકેલા રેલ્વે સ્ટેશન પર 60 કિલો ચાંદીના દાગીના જપ્ત ટ્રેન મારફતે ચાંદીની હેરફેર કરવામાં આવી રહી હતી

સરકારી રેલ્વે પોલીસ એ ઓડિશાના રૌરકેલા રેલ્વે સ્ટેશન પર 60 કિલો ચાંદીના દાગીના જપ્ત કર્યા છે. મળતી માહિતી મુજબ, આ ચાંદી એક ટ્રેન દ્વારા ગેરકાયદેસર રીતે લઈ જવામાં આવી રહી હતી. પોલીસે આગ્રાથી રાંચી જઈ રહેલા ચંદન કુમાર નામના વ્યક્તિની ધરપકડ કરી હતી. પૂછપરછ દરમિયાન તેણે સંતોષકારક જવાબો આપ્યા ન હતા, ત્યારબાદ તેને જીએસટી વિભાગને સોંપવામાં આવ્યો હતો. 

ચંદન કુમારે અધિકારીઓને જણાવ્યું કે તેમને રાઉરકેલામાં જ રહેવું પડ્યું કારણ કે તેમને રાંચી માટે સીધી ટ્રેન મળી શકી ન હતી. જો કે, આટલી મોટી માત્રામાં ચાંદી લઈ જવા માટે તેણે કોઈ યોગ્ય જવાબ આપ્યો ન હતો. જીએસટી વિભાગના ડેપ્યુટી કમિશનર એ જણાવ્યું હતું કે ચંદન કુમારે આગ્રામાં 51 કિલો ચાંદી ખરીદી હતી અને તેના માટે કેટલાક બિલ રજૂ કર્યા હતા, પરંતુ આ બિલોમાં ઘણી ગેરરીતિઓ જોવા મળી હતી. વધુમાં, તેણે રાઉરકેલામાં 10 કિલો વધુ ચાંદી ખરીદી હતી પરંતુ તેના માટે કોઈ બિલ રજૂ કર્યું ન હતું.