ડેવિસ કપની ફાઈનલમાં રશિયા-ક્રોએશિયા વચ્ચે મેચ રમાશે

ડેવિસ કપની ફાઈનલમાં રશિયા અને ક્રોએશિયા વચ્ચે મુકાબલો રમાશે. ક્રોએશિયાએ સેમિફાઈનલમાં વર્લ્ડ નંબર વન યોકોવિચની સર્બિયન ટીમને 2-1થી હરાવી હતી. જ્યારે રૂબ્લોવ અને મેડ્વેડેવે શરૂઆતની સિંગલ્સ મેચો જીતી લેતા રશિયાને જર્મની સામે 2-0થી વિજય અપાવ્યો હતો. આ સાથે તેઓ ફાઈનલમાં પ્રવેશ્યા હતા. મેડ્રિડમાં રમાયેલી ક્રોએશિયા અને સર્બિયા વચ્ચેનો મુકાબલો રોમાંચક બની રહ્યો હતો. ક્રોએશિયાના બોર્ના ગોજોએ 4-6,6-3,6-2થી લાજોવિચને હરાવ્યો હતો. આ સાથે સર્બિયા ૦-1થી પાછળ પડી ગયું હતુ. વર્લ્ડ નંબર વન ટેનિસ સ્ટાર યોકોવિચ બીજી સિંગલ્સમાં ક્રોએશિયાના મરિન સિલીચ સામે ખુબ આસાનીથી 6-4,6-2થી જીત્યો હતો. ડબલ્સમાં યોકોવિચ અને ક્રાજીનોવિચની જોડી ઉતરી હતી. ક્રોએશિયાના મેક્ટિચ અને પાવિચે તેમને 7-5,6-1થી હરાવતા ક્રોએશિયાને ફાઇનલમાં પ્રવેશ અપાવ્યો હતો. જર્મની સામેની સેમિફાઈનલમાં રૂબ્લોવે 6-4,6-0થી કોપ્ફેરને હરાવતા રશિયાને વિજયી શરૂઆત અપાવી હતી. જે પછી મેડ્વેડેવે 6-4,6-3થી જર્મનીના જેન-લેનાર્ડ સ્ટ્રુફને પરાસ્ત કરતાં રશિયાને જીતાડયું હતુ.