IPL-14ના બીજા ફેઝ પહેલા એ.બી.ડીવિલિયર્સે આક્રમક બેટિંગ કરી

Sports
Sports 161

ઈન્ડિયન પ્રીમિયર લીગની 14મી સિઝનનો ફેઝ-2 19 સપ્ટેમ્બરથી શરૂ થવા જઈ રહ્યો છે. તેવામાં દરેક ટીમના ખેલાડીઓ આ ટૂર્નામેન્ટની સિઝનને જીતવા માટે પૂર જોશમાં તૈયારીઓ કરી રહ્યા છે. ટીમ પોત-પોતાની રીતે તાલીમ મેળવી રહી છે. તેવામાં રોયલ ચેલેન્જર્સ બેંગ્લોરની ટીમે પણ પ્રેક્ટિસ મેચ રમી હતી જેમાં તેના સ્ટાર બેટ્સમેન એ.બી.ડીવિલિયર્સે 10 છગ્ગા સાથે આક્રમક બેટિંગ કરીને પોતાની તાકાતનો પરચો બતાવી દીધો હતો. જેનો વીડિયો સોશિયલ મીડિયામાં વાઇરલ થઈ રહ્યો છે.

આ મેચમાં કેપ્ટન વિરાટ કોહલી, મોહમ્મદ સિરાજ અને ડેન ક્રિસ્ચિયન ક્વોરન્ટીન હોવાથી સામેલ થયા નહતા. RCBની સ્ક્વોડે RCB-A અને RCB-B નામની 2 ટીમ બનાવીને એક પ્રેક્ટિસ મેચ રમી હતી. જેની કેપ્ટનશિપ હર્ષલ પટેલ (A) અને દેવદત્ત પડ્ડિકલે (B) કરી હતી.

RCB-Aની ટીમે ટોસ જીતી પહેલા બેટિંગ પસંદ કરી
RCB-Aની ટીમે પહેલા ટોસ જીતીને બેટિંગ કરવાનો નિર્ણય લીધો હતો. જે ટીમમાં એ.બી.ડીવિલિયર્સ પણ સામેલ હતો. તેણે 46 બોલમાં આક્રમક બેટિંગ કરીને 104 કર્યા હતા. તેણે પોતાની આ ઈનિંગમાં 4 ચોગ્ગા અને 10 છગ્ગા પણ માર્યા હતા. ઉલ્લેખનીય છે કે એ.બી.ડીવિલિયર્સે જો પ્રેક્ટિસમાં પોતાનો 360 ડિગ્રી મોડ ઓન કરી દીધો છે તો IPL-14ના ફેઝ-2માં દર્શકો તેની બેટિંગ જોવા માટે આતૂર રહેશે.

એ.બી.ડીવિલિયર્સ સિવાય મોહમ્મદ અઝહરુદ્દીને પણ 43 બોલમાં 3 છગ્ગા અને 4 ચોગ્ગાની સહાયથી 66 રન કર્યા હતા. ડીવિલિયર્સ અને અઝહરુદ્દીન વચ્ચે સારી પાર્ટનરશિપ નોંધાઈ હોવાથી તેમણે RCB-Bને 213 રનનો ટાર્ગેટ આપ્યો હતો.

213 રનના ટાર્ગેટને ચેઝ કરવા ઉતરેલી RCB-B ટીમના કેપ્ટન દેવદત્ત પડ્ડિકલે મજબૂત શરૂઆત આપી હતી. તેણે કે.એસ.ભારત સાથે પ્રશંસનીય પાર્ટનરશિપ નોંધાવી હતી. આ મેચમાં કે.એસ.ભારતે 47 બોલમાં 95 રન કર્યા હતા જ્યારે દેવદત્ત પડ્ડિકલે 21 બોલમાં 36 રન કર્યા હતા. જોકે આ મેચમાં RCB-Bએ અંતિમ 2 બોલમાં રોમાંચક મેચને 7 વિકેટે જીતી લીધી હતી. તમને જણાવી દઇએ કે RCBની ટીમ આ ટર્મમાં ઘણા રિપ્લેસમેન્ટ સાથે મેદાનમાં ઉતરશે. તે પહેલી મેચ 20 સપ્ટેમ્બરે કોલકાતા નાઇટ રાઇડર્સ સામે રમશે.


  • Sign up
Lost your password? Please enter your username or email address. You will receive a link to create a new password via email.