સાબરકાંઠા જિલ્લાની તાલુકા પંચાયતમાં ભાજપના પ્રમુખ-ઉપપ્રમુખની બિનહરીફ વરણી

સાબરકાંઠા જિલ્લા પંચાયત અને આઠ તાલુકા પંચાયતમાં પ્રમુખ-ઉપપ્રમુખની ગુરુવારે ચૂંટણી પ્રક્રિયા હાથ ધરવામાં આવી હતી. જેમાંથી જિલ્લા પંચાયત અને સાત તાલુકા પંચાયતમાં સામે કોઈ ઉમેદવારી પત્રો નહિ ભરાવવાને લઈને પ્રમુખ-ઉપપ્રમુખની બિનહરીફ વરણી થઇ છે. સદસ્યો અને હોદ્દેદારોએ નવા પ્રમુખ, ઉપપ્રમુખને મોં મીઠું કરાવીને ફૂલહાર અને છડીઓ આપી શુભેચ્છાઓ પાઠવી હતી.સાબરકાંઠા જિલ્લા પંચાયત અને આઠ તાલુકા પંચાયતમાં અઢી વર્ષની મુદત પૂર્ણ થવાને લઈને નવ પ્રમુખ અને ઉપપ્રમુખ માટેની સેન્સ પ્રક્રિયા બાદ પ્રમુખ, ઉપપ્રમુખના નામો જાહેર કરવામાં આવ્યા હતા. ત્યાર બાદ ગુરુવારે આઠ તાલુકા પંચાયત અને જિલ્લા પંચાયતમાં ખાસ સામાન્ય સભામાં ચૂંટણી અધિકારીની ઉપસ્થિતિમાં ચૂંટણી પ્રક્રિયા હાથ ધરવામાં આવી હતી.

હિંમતનગર, ઇડર, વડાલી, ખેડબ્રહ્મા, પોશીના, વિજયનગર, તલોદ તાલુકા પંચાયત અને સાબરકાંઠા જિલ્લા પંચાયતમાં ભાજપના ઉમેદવારો સિવાય કોઈના ઉમેદવારી પત્રો નહિ ભરાતા તમામ સાત તાલુકા પંચાયત અને સાબરકાંઠા જિલ્લા પંચાયતના પ્રમુખ ઉપપ્રમુખને બિનહરીફ જાહેર કરવામાં આવ્યા હતા.સાબરકાંઠા જિલ્લા પંચાયતના નવા મહિલા પ્રમુખ ભારતીબેન પટેલ અને ઉપપ્રમુખ તારાબા ઝાલાએ ભાજપનો આભાર માન્યો હતો અને સૌને સાથે લઈને જિલ્લા પંચાયતની કામગીરી કરવામાં આવશે તેવી વાત કરી હતી. બીજી તરફ હિંમતનગરમાં જિલ્લા પંચાયત અને તાલુકા પંચાયતમાં સદસ્યો અને હોદ્દેદારોએ નવા પ્રમુખ, ઉપપ્રમુખનુ મોં મીઠું કરાવીને ફૂલહાર અને છડીઓ આપી શુભેચ્છાઓ પાઠવી હતી.આ અંગે સાબરકાંઠા જિલ્લા ભાજપના પ્રમુખ કનુભાઈ પટેલે જણાવ્યું હતું કે, સાબરકાંઠા જિલ્લા પંચાયત અને સાત તાલુકા પંચાયતમાં પક્ષે મેન્ડેટ આપેલા પ્રમુખ અને ઉપપ્રમુખની બિન હરીફ વરણી થઈ છે.