હિંમતનગરમાં દિવ્યાંગ બાળકો સાથે યુવા અને શહેર ભાજપ ગરબે ઘુમ્યું

સાબરકાંઠા જિલ્લાના હિંમતનગરમાં છાપરીયા વિસ્તારમાં એક શિશુ વિહારમાં શહેર અને યુવા ભાજપના હોદ્દેદારો અને કાર્યકર્તાઓ દિવ્યાંગ બાળકો સાથે એક રાત્રિ ગરબા ઉત્સવ હેઠળ ગરબે ઘૂમ્યા હતા.આવતીકાલથી નવરાત્રિ શરુ થવાની છે ત્યારે શુક્રવારની રાત્રિએ હિંમતનગર શહેર ભાજપ યુવા મોરચા અને શહેર ભાજપ સંગઠન દ્વારા એક રાત્રિ ગરબા ઉત્સવ હેઠળ દિવ્યાંગ બાળકો સહ રંગ રાસ ઉત્સવનું છાપરીયા વિસ્તારના વિનાયકનગરમાં આવેલા મમતા શિશુ વિહાર ખાતે આયોજન કરવામાં આવ્યું હતું. આ શિશુ વિહારમાં અંદાજે 70 જેટલા દિવ્યાંગ બાળકો રહે છે અને અભ્યાસ કરે છે. ત્યારે રાત્રિના 8 વાગે માતાજીની આરતી બાદ ગરબાનો ઉત્સવના પ્રારંભ થયો હતો.

હિંમતનગર ધારાસભ્ય વી.ડી.ઝાલા, પાલિકા પ્રમુખ વિમલ ઉપાધ્યાય સહિત યુવા અને શહેર ભાજપ સંગઠનના હોદ્દેદારો અને કાર્યકર્તાઓ ઉપરાંત મહિલા મોરચાના સદસ્યો પણ કાર્યક્રમમાં જોડાયા હતા. દીવ્યાંગો બાળકો સાથે બેથી અઢી કલાક ગરબા રમ્યા બાદ દૂધ પૌંઆનું વિતરણ કરવામાં આવ્યું હતું.