પત્ની સાથે સહમતિ વગર જાતીય સંબંધને ગુનો ગણવા અંગે દિલ્હી હાઇકોર્ટનો ‌વિભાજિત ચુકાદો

દિલ્હી હાઇ કોર્ટે બુધવારે લગ્નજીવન દરમિયાન પત્નીની સહમતિ વગર તેની સાથે જાતીય સંબંધ બાંધવાને ગુનો ગણવાના મુદે વિભાજિત ચુકાદો આપ્યો છે. એક જજે આ જોગવાઇને રદ કરવાની તરફેણ કરી હતી તો અન્ય જજે ઠરાવ્યું છે કે આ ગેરબંધારણીય નથી.
ડિવિઝન બેન્ચે સુપ્રીમ કોર્ટ સમક્ષ આ મામલે અપીલ ફાઇલ કરવાનો અધિકાર પક્ષકારોને આપ્યું છે. ડિવિઝન બેન્ચનું અધ્યક્ષપદ સંભાળનાર જસ્ટિસ રાજીવ શકધરે મેરિટલ રેપને કાઢી નાખવાની તરફેણ કરી હતી તો જસ્ટિસ સી હરિ શંકરે કહ્યું હતું કે આઇપીસી હેઠળની છૂટછાટ ગેરબંધારણીય નથી.અરજીકર્તાઓએ કલમ ૩૭૫ (બળાત્કાર) હેઠળ લગ્ન અંગેના બળાત્કારની બંધારણીયતાને પડકારી હતી. દલીલ એવી હતી કે તેમના પતિઓ દ્વારા જાતીયરીતે ભોગ બનનાર પરિણીત મહિલાઓ સામે ભેદભાવ થઇ હોવાની દલીલ કરી હતી.

આઇપીસીની કલમ ૩૭૫ હેઠળ અપાયેલી છૂટછાટો હેઠળ એક  પુરુષ દ્વારા તેમની પત્ની સાથે જાતીય સમાગમ કે જાતીય કૃત્યો જો તે સગીર ન હોય તો તે રેપ ન ગણાય. આ ચુકાદો જાહેર કરતાં જસ્ટિસ શકધરે જણાવ્યું હતું કે જ્યાં સુધી મને લાગે-વળગે છે કે કલમ ૩૭૫ની કલમ બે એ આર્ટિકલ ૧૪નો ભંગ છે. આ કલમ ૧૫ (ધર્મ, જાતિ, લિંગ કે જન્મની તારીખના ભેદભાવ પર પ્રતિબંધ), ૧૯ (૧) (એ) (બોલવાની અને અભિવ્યક્તિનો અધિકાર)નો પણ ભંગ છે.

તેમણે ઉમેર્યું હતું કે પિટીશનરો દ્વારા કરાયેલી જોગવાઇઓ અંગેનો પડકાર ટકી શકાય તેમ નથી. એનજીઓના આરટીઆઇ દ્વારા ફાઇલ કરવામાં આવેલી જાહેર હિતની અરજીઓ પર તેમણે ચુકાદો આપ્યો હતો. આ અરજીઓમાં એનજીઓ આરટીઆઇ ફાઉન્ડેશન, ઓલ ઇન્ડિયા ડેમોક્રેટિક વુમન્સ એસોસિએશન, એક પુરુષ અને એક મહિલાને ભારતીય રેપ કાયદા હેઠળ પતિઓને અપાયેલી છૂટને કાઢી નાખવાની માગણી કરી હતી. ૨૦૧૭માં કરાયેલી એફિડેવિટમાં કેન્દ્રે અરજીઓનો વિરોધ કર્યો હતો. તેમાં જણાવાયું છે કે લગ્ન અંગેના રેપને ગુનો ન ગણી શકાય કેમ કે તે લગ્નની સંસ્થાને અસ્થિર બનાવવા અને પતિઓને હેરાન કરવા માટેનું એક સરળ સંશાધન બની શકે છે.