શાંતિ પુનઃસ્થાપન માટે નવી વ્યવસ્થા, સેના તૈનાતી માટે નવી વ્યૂહરચના

મણિપુરમાં સતત હિંસાની વચ્ચે હવે રણનીતિમાં કેટલાક ફેરફાર કરવામાં આવ્યા છે. અલગ-અલગ જગ્યાએ અલગ-અલગ ફોર્સની ટુકડીઓને બદલે એક જ જગ્યાએ એક ફોર્સની ટુકડીઓ તૈનાત રહેશે. કેટલાક જિલ્લાઓમાં સૈન્ય તૈનાતી માટે આ વ્યૂહરચના અપનાવવામાં આવશે. સેના કેટલાક વિસ્તારોમાં બફર ઝોન બનાવશે, જેથી ઘાટીના લોકોને પહાડી પર જતા અથવા પહાડીના લોકોને ઘાટીમાં આવતા અટકાવી શકાય.

ઇમ્ફાલ અને પશ્ચિમી કાંગપોકપી સરહદ પર ગુરુવારે ફરી હિંસા ફાટી નીકળી હતી, જેમાં ઓછામાં ઓછા બે લોકોએ જીવ ગુમાવ્યો હતો. છેલ્લા દિવસોમાં અહીં સતત આગચંપી થતી હતી. સૈનિકો તૈનાત હોવા છતાં, લોકો આગચંપી કરતા હતા. જાણવા મળ્યું કે જવાનો વચ્ચે યોગ્ય તાલમેલના અભાવે આગચંપી-હિંસા પર કાબૂ મેળવી શકાયો નથી. આ પછી નિર્ણય લેવામાં આવ્યો કે એક જગ્યાએ માત્ર એક ટુકડી તૈનાત કરવામાં આવે. આનાથી સંકલન સ્થાપિત કરવાનું સરળ બનશે.

ઈન્ડિયન એક્સપ્રેસના એક અહેવાલ મુજબ વરિષ્ઠ અધિકારીએ જણાવ્યું કે કમાન્ડ અને કંટ્રોલમાં સરળતા રહેશે. લોજિસ્ટિક્સ મેનેજમેન્ટ સરળ રહેશે. ઉદાહરણ તરીકે, જો બીએસએફને બિષ્ણુપુર અને ચુરાચંદપુરમાં તૈનાત કરવામાં આવે છે, તો તે આ વિસ્તારમાં સુરક્ષાની જવાબદારી સંભાળશે. જો કોઈ ક્ષતિ હશે તો તેના માટે માત્ર BSF જ જવાબદાર રહેશે. હાલમાં સ્થિતિ એવી છે કે મોટાભાગનો સમય સંકલનમાં જ પસાર થાય છે.

મીડિયા રિપોર્ટ્સ અનુસાર મણિપુરમાં 40 હજાર સેન્ટ્રલ ફોર્સ તૈનાત છે. જેમાં આસામ રાઇફલ્સ, ભારતીય સેના, BSF, CRPF અને ITBPનો સમાવેશ થાય છે. કોઈ પણ ખતરાવાળા વિસ્તારોમાં આ અલગ અલગ ટીમનાં જવાનોની એક ટુકડી બનાવીને તૈનાત કરવામાં આવી છે. જો સૈન્ય મોઇરાંગ ખાતે તૈનાત છે, તો આસામ રાઇફલ્સ થોડા કિલોમીટર દૂર તોરબાંગ ખાતે તૈનાત છે. આ દરમિયાન બીએસએફ અને સીઆરપીએફની તૈનાતી પણ જોઈ શકાય છે.