‘UPSCને મારી સામે પગલાં લેવાનો કોઈ અધિકાર નથી,’ પૂજા ખેડકરે વળતો પ્રહાર કર્યો

બરતરફ કરાયેલી IAS ઓફિસર પૂજા ખેડકરે UPSC પર વળતો પ્રહાર કર્યો છે. તેણે કહ્યું કે UPSC પાસે તેની સામે કાર્યવાહી કરવાની કોઈ સત્તા નથી. પૂજા ખેડકરે UPSC દ્વારા તેમની સામે લગાવવામાં આવેલા આરોપો અંગે દિલ્હી હાઈકોર્ટને આપેલા જવાબમાં જણાવ્યું હતું કે એકવાર પસંદગી પામ્યા પછી અને પ્રોબેશનર તરીકે નિયુક્ત થયા પછી, UPSCને તેની ઉમેદવારીને ગેરલાયક ઠેરવવાનો કોઈ અધિકાર નથી. ખેડકરે એમ પણ કહ્યું હતું કે તેણે યુપીએસસીમાં તેના નામ સાથે છેડછાડ કરી નથી કે કોઈ ખોટી માહિતી આપી નથી. કોર્ટે ખેડકરને UPSC અને દિલ્હી પોલીસના સ્ટેન્ડનો જવાબ આપવા માટે સમય આપ્યો છે.

UPSCએ દિલ્હી હાઈકોર્ટમાં પૂર્વ IAS પ્રોબેશનરની આગોતરા જામીન અરજીનો વિરોધ કર્યો હતો અને કહ્યું હતું કે તેણે કમિશન અને જનતા સાથે છેતરપિંડી કરી છે. દિલ્હી પોલીસે તેની આગોતરા જામીન અરજીને આ આધાર પર નકારી કાઢવાની પણ માંગ કરી હતી કે તેને કોઈ રાહત આપવાથી “ઊંડા કાવતરા”ની તપાસમાં અવરોધ આવશે અને આ કેસની અસર જાહેર સેવાઓ તેમજ ઈમાનદારી પર પડશે પણ ભારે અસર થશે.

જવાબમાં UPSCએ શું કહ્યું?

યુનિયન પબ્લિક સર્વિસ કમિશન (UPSC) એ કોર્ટમાં દાખલ કરેલા તેના જવાબમાં જણાવ્યું હતું કે “છેતરપિંડી” ની ગંભીરતાને પ્રકાશિત કરવા માટે ખેડકરની કસ્ટોડિયલ પૂછપરછ જરૂરી હતી, જે અન્ય વ્યક્તિઓની મદદ વિના આચરવામાં આવી ન હોત. તેથી તેની ધરપકડ પૂર્વેની જામીન અરજી ફગાવી દેવી જોઈએ. ખેડકરે અનામતનો લાભ મેળવવા માટે UPSC સિવિલ સર્વિસ પરીક્ષા-2022 માટેની તેમની અરજીમાં કથિત રીતે ખોટી માહિતી આપી હતી.

તમને જણાવી દઈએ કે 31 જુલાઈના રોજ UPSC એ પૂજા ખેડકરની ઉમેદવારી રદ કરી હતી અને તેને ભવિષ્યની પરીક્ષાઓમાંથી પણ દૂર કરી દીધી હતી. દિલ્હી પોલીસે ઇન્ડિયન પીનલ કોડ, ઇન્ફોર્મેશન ટેક્નોલોજી એક્ટ અને રાઇટ્સ ઑફ પર્સન્સ વિથ ડિસેબિલિટી એક્ટની જોગવાઈઓ હેઠળ FIR નોંધી છે.