UKની સ્ટુડન્ટ વિઝા ફીમાં રૂપિયા ૧૩,૦૦૦નો વધારો

લંડન, હાયર એજ્યુકેશન માટે વિદેશ જતા ભારતીયોમાં યુકે એક મહત્ત્વનો દેશ છે. અહીંની વિશ્વવિખ્યાત કોલેજો અને યુનિવર્સિટીઓ ભારતીયોને હંમેશાથી આકર્ષતી રહી છે. છેલ્લા કેટલાક સમયમાં મોંઘવારી વધવાની સાથે સાથે યુકેમાં ભણવાનો ખર્ચ પણ વધતો જાય છે. તાજેતરમાં યુકેએ સ્ટુડન્ટ વિઝાની ફી વધારવાનો નિર્ણય લીધો છે. આ વધારો ૪ ઓક્ટોબરથી લાગુ થશે. ભારતીય વિદ્યાર્થીઓએ યુકેના વિઝા માટે ૧૨૭ પાઉન્ડ વધારે ચુકવવા પડશે. એટલે કે લગભગ ૧૩,૦૦૦ રૂપિયાનો ખર્ચ વધી જશે.

યુકેની સંસદે સ્ટુડન્ટ વિઝા ફી વધારવા માટે ગયા અઠવાડિયે કાયદો પસાર કરી દીધો હતો. નવા સ્ટ્રક્ચર પ્રમાણે યુકેમાં છ મહિનાથી ઓછું રોકાણ કરવું હોય તો તેવા વિઝિટ વિઝા માટે ૧૫ પાઉન્ડનો વધારાનો ચાર્જ લાગશે, જ્યારે સ્ટુડન્ટ વિઝા ૧૨૭ પાઈન્ડ મોંઘા પડશે.
હવેથી યુકેના છ મહિનાથી ઓછા સમયના વિઝિટ વિઝા જોઈતા હોય તો ૧૧૫ પાઉન્ડની વિઝા ફી ભરવી પડશે. જ્યારે યુકેના સ્ટુડન્ટ વિઝાની ફી ૪૯૦ પાઉન્ડ જેટલી રહેશે.

યુકેમાં હાલમાં સરકાર અને પબ્લિક સેક્ટરના સાહસો વચ્ચે વેતનના મામલે ખેંચતાણ ચાલે છે. અહીં નેશનલ હેલ્થ સર્વિસમાં કામ કરતા લોકો વારંવાર હડતાલની ધમકી આપે છે અને વધારે વેતનની માંગણી કરી રહ્યા છે. તેના કારણે યુકેના વડાપ્રધાન યુકે સુનક આવક વધારવા માટે નવા નવા રસ્તા શોધી રહ્યા છે. જુલાઈ મહિનામાં જ સુનકે કહ્યું હતું કે નેશનલ હેલ્થ સર્વિસમાં જે ખર્ચ આવે છે તેને સપોર્ટ કરવા માટે વિઝા અરજદારો દ્વારા ચુકવવામાં આવતા હેલ્થ સરચાર્જ અને ફીમાં વધારો કરવામાં આવશે.

સુનકે કહ્યું કે માઈગ્રન્ટ લોકો યુકે આવે ત્યારે વિઝા માટે જે ચાર્જ ચુકવે છે તેમાં વધારો કરવામાં આવશે. યુકેએ મોટા ભાગના વર્ક અને વિઝિટ વિઝાની ફીમાં ૧૫ ટકાનો વધારો કરવા નિર્ણય લીધો છે. પ્રાયોરિટી વિઝા, સ્ટડી વિઝા અને સ્પોન્સરશિપના સર્ટિફિકેટમાં ઓછામાં ઓછા ૨૦ ટકાનો વધારો કરવામાં આવશે.

હોમ ઓફિસે આ ફી વધારાને યોગ્ય ગણાવીને કહ્યું કે ઇમિગ્રેશન અને નેશનાલિટી સિસ્ટમ ચલાવવા માટે ફીની આવકમાં વધારાથી ઘણો ફાયદો થશે. ફી નક્કી કરતી વખતે ઘણી બાબતો વિચારવામાં આવે છે જેથી યુકેના કરદાતાઓ પર ઓછો ટેક્સ બોજ આવે. હવે જે ફી વધારવામાં આવી છે તે અલગ અલગ કેટેગરીમાં લાગુ થશે. તેમાં હેલ્થ અને કેર વિઝા, બ્રિટિશ સિટિઝનશિપ માટે એપ્લિકેશન અને છ મહિના, બે વર્ષ, પાંચ વર્ષ અને દશ વર્ષના વિઝિટ વિઝા માટેની ફીનો સમાવેશ થાય છે.યુકે સરકારે તમામ પ્રકારની ફીમાં જે વધારો કર્યો તે સંસદની મંજૂરીને આધિન છે અને ચોથી ઓક્ટોબરથી લાગુ થશે. આ વધારો મોટા ભાગની એન્ટ્રી ક્લિયરન્સ ફી અને યુકેમાં રહેવા માટે લિવ એપ્લિકેશનને પણ લાગુ થશે.