જન્મદિવસ નિમિત્તે PM મોદીની ઓડિશા મુલાકાત, મહિલાઓને આપશે આ ખાસ ભેટ

વડાપ્રધાન નરેન્દ્ર મોદી આજે તેમના જન્મદિવસ નિમિત્તે ઓડિશાના પ્રવાસે છે. રાજ્યની ભાજપ સરકારે તેમના સ્વાગત માટે ઝીણવટભરી વ્યવસ્થા કરી છે. 12 જૂને મુખ્યમંત્રી મોહન ચરણ માઝીના શપથ ગ્રહણ સમારોહમાં હાજરી આપ્યા બાદ વડાપ્રધાનની આ રાજ્યની પ્રથમ મુલાકાત છે. આ મુલાકાત દરમિયાન વડાપ્રધાન મોદી મહિલાઓ માટે રાજ્ય સરકારની સામાજિક કલ્યાણ યોજના (સુભદ્રા યોજના)નું લોકાર્પણ કરશે. વડાપ્રધાન અનેક ઈન્ફ્રાસ્ટ્રક્ચર પ્રોજેક્ટ્સનું પણ લોકાર્પણ કરશે.

અધિકારીઓએ જણાવ્યું કે તેઓ સવારે 10:50 વાગ્યે બીજુ પટનાયક ઈન્ટરનેશનલ એરપોર્ટ પર ઉતરશે અને પછી ગડકાના ગામ જશે. અહીં તેઓ પ્રધાનમંત્રી આવાસ યોજનાના લાભાર્થીઓ સાથે વાતચીત કરશે. તેમણે કહ્યું કે આ પછી તેઓ બપોરે લગભગ 12 વાગ્યે જનતા મેદાન પહોંચશે, જ્યાંથી તેઓ સુભદ્રા યોજનાની શરૂઆત કરશે. તેઓ રૂ. 2,871 કરોડના રેલવે પ્રોજેક્ટ્સ અને રૂ. 1,000 કરોડના હાઇવે પ્રોજેક્ટ્સનું પણ લોકાર્પણ કરશે.