તેલંગાણામાં ભારે વરસાદ, અત્યાર સુધીમાં 31 લોકોના મોત

તેલંગાણા અને આંધ્રપ્રદેશમાં મુશળધાર વરસાદને કારણે અત્યાર સુધીમાં 31 લોકોના મોત થયા છે. આ ઉપરાંત રોડ અને રેલવે ટ્રેક જેવા વાહનવ્યવહારના સાધનોને પણ નુકસાન થયું છે. હજારો એકર ખેતીની જમીન પાણીમાં ડૂબી ગઈ છે અને બચાવ અને પુનર્વસન કાર્ય માટે એજન્સીઓને તૈનાત કરવામાં આવી છે. તેલુગુભાષી બંને રાજ્યો સોમવારે વરસાદથી પ્રભાવિત થયા હતા. વરસાદ સંબંધિત ઘટનાઓમાં તેલંગાણામાં 16 અને પડોશી આંધ્ર પ્રદેશમાં 15 લોકોના મોત થયા છે. તેલંગાણામાં સમુદ્રમ પાસે રેલ્વે ટ્રેક નીચે કાંકરીનો એક ભાગ પૂરના પાણીને કારણે ધોવાઈ ગયો હતો. આંધ્રપ્રદેશમાં લગભગ 4.5 લાખ લોકો પ્રભાવિત થયા છે. વિજયવાડામાં લોકોને દૂધ સહિતની આવશ્યક ચીજવસ્તુઓ મેળવવા માટે ઘણી મુશ્કેલીનો સામનો કરવો પડી રહ્યો છે.

સૌથી વધુ અસરગ્રસ્ત જિલ્લાઓમાં એનટીઆર, ગુંટુર, કૃષ્ણા, એલુરુ, પલાનાડુ, બાપટલા અને પ્રકાશમનો સમાવેશ થાય છે, એમ એક સત્તાવાર અખબારી યાદીમાં જણાવાયું છે. SDRFની 20 ટીમો અને NDRFની 19 ટીમો રાહત અને બચાવ કાર્યમાં લાગેલી છે. છેલ્લા ત્રણ દિવસથી મુશળધાર વરસાદ અને ઘણા ભાગોમાં 24 કલાકથી વધુ સમય માટે વીજ કાપને કારણે, વિજયવાડામાં જનજીવન સંપૂર્ણપણે ઠપ થઈ ગયું છે. પૂરના કારણે ઈન્ટરનેટ અને મોબાઈલ ટેલિફોન સેવાઓ ખોરવાઈ ગઈ છે. હૈદરાબાદની કનેક્ટિવિટી પ્રભાવિત થઈ હતી. વિજયવાડા શહેર અને તેની આસપાસના વિસ્તારોમાં પરિવહન સેવાઓ ખોરવાઈ ગઈ છે. દરમિયાન સોમવારે સવારે 8 વાગ્યા સુધી પ્રકાશમ બેરેજમાંથી 11.3 લાખ ક્યુસેક પૂરનું પાણી છોડવામાં આવ્યું હતું.