વરસાદના ટીપાંથી ભીંજાયું દિલ્હી, G-20 દરમિયાન આગામી ત્રણ દિવસ કેવું રહેશે હવામાન; જાણો

ગરમી અને ભેજથી પરેશાન દિલ્હીના લોકોને ગુરુવારે થોડી રાહત આપી છે. દિલ્હીના ઘણા વિસ્તારોમાં વરસાદ પડ્યો હતો જેના કારણે લોકોના ચહેરા ખીલી ઉઠ્યા હતા. ભારતીય હવામાન વિભાગ (IMD) અનુસાર, દિલ્હીના કેટલાક સ્થળો તેમજ આસપાસના વિસ્તારોમાં ગાજવીજ સાથે મધ્યમથી ભારે વરસાદની સંભાવના છે.

હવામાન વિભાગે જણાવ્યું કે જે વિસ્તારોમાં મધ્યમથી ભારે વરસાદની અપેક્ષા છે તેમાં બુરારી, કાંઝાવાલા, રોહિણી, બદિલી, મુંડકા, પશ્ચિમ વિહાર, નજફગઢ અને બહાદુરગઢ, ફારુખનગર અને હરિયાણાના રેવાડીનો સમાવેશ થાય છે જે રાષ્ટ્રીય રાજધાની પ્રદેશ (NCR)માં આવે છે. દિલ્હીના બવાના, અલીપોર, પિતામપુરા, પંજાબી બાગ, રાજૌરી ગાર્ડન, પટેલ નગર, દ્વારકા, પાલમ, હરિયાણાના લોહારુ, ઉત્તર પ્રદેશના બરૌત, બાગપત અને રાજસ્થાનના પિલાની, ઝુંઝુનુ સહિત વિવિધ સ્થળોએ હળવાથી મધ્યમ વરસાદની અપેક્ષા છે.

G-20 દરમિયાન દિલ્હીમાં કેવું રહેશે હવામાન?

રાજધાની દિલ્હીમાં G-20 સમિટ 8-10 સપ્ટેમ્બર વચ્ચે યોજાવાની છે. તે દરમિયાન હવામાન કેવું રહેશે તેવી આગાહી પણ હવામાન વિભાગે કરી છે. હવામાન વિભાગે બુલેટિનમાં જણાવ્યું છે કે સમિટ પહેલા દિલ્હીનું તાપમાન ઘટશે. ગુરુવારથી હવામાન વિભાગે ખાસ બુલેટિન જારી કરવાનું શરૂ કર્યું છે. લેટેસ્ટ બુલેટિન મુજબ વાદળછાયા આકાશને કારણે શહેરમાં ખુશનુમા વાતાવરણ રહેવાની શક્યતા છે અને જોરદાર પવન પણ ફૂંકાઈ શકે છે. જેના કારણે આગામી 2-3 દિવસમાં તાપમાનમાં ઘટાડો જોવા મળશે.

IMD એ પ્રગતિ મેદાન પાસે ઓટોમેટિક વેધર સ્ટેશન (AWS) ની સ્થાપના કરી છે, જ્યાં G20 સમિટ યોજાશે. આ વેધર સ્ટેશન G20 જેવી ઉચ્ચ સ્તરીય ઘટનાઓને ધ્યાનમાં રાખીને ખાસ અને વાસ્તવિક સમયની હવામાન માહિતી આપશે. વેધર ફોરકાસ્ટિંગ એજન્સીની 24×7 મોનિટરિંગ સિસ્ટમ ગુરુવારે સવારે શરૂ કરવામાં આવી હતી.

આ હવામાન અપડેટ્સ નિયમિત ધોરણે જારી કરવામાં આવશે. રીઅલ ટાઇમ ડેટા G20 સમિટ સ્થળની નજીક નવા સ્થાપિત AWS પરથી ઉપલબ્ધ થશે. આ G20 સમિટના કામના સંચાલનમાં અને હવામાનથી બચવાની તૈયારીમાં મદદ કરશે. જો કે રવિવાર સુધી દિલ્હીમાં વાદળછાયું વાતાવરણ રહેવાની શક્યતા છે. AWS હવાનું તાપમાન, ભેજ, પવનની ગતિ, દિશા અને વરસાદની સચોટ માહિતી આપશે. દર 15 મિનિટે ડેટા અપડેટ કરવામાં આવશે. આનાથી સચોટ માહિતી લોકો સુધી પહોંચશે. પ્રગતિ મેદાન ઉપરાંત દિલ્હીના નવ મહત્વના વિસ્તારો માટે પણ આવી જ માહિતી ઉપલબ્ધ કરાવવામાં આવશે. આ વિસ્તારો છે – ઈન્દિરા ગાંધી ઈન્ટરનેશનલ એરપોર્ટ, નવી દિલ્હી રેલ્વે સ્ટેશન, ચાંદની ચોક, અક્ષરધામ મંદિર, લોટસ ટેમ્પલ, કુતુબ મિનાર, લાલ કિલ્લો/રાજઘાટ, દિલ્હી યુનિવર્સિટી અને લોધી રોડ (લોધી ગાર્ડન).