ઉદયપુરમાં કોંગ્રેસની નવ સંકલ્પ ચિંતન શિબિરઃ રાહુલ ગાંધી 74 નેતાઓ સાથે પહોંચ્યા, ઉમળકાભેર સ્વાગત કરવામાં આવ્યું

કોંગ્રેસની નવ સંકલ્પ શિબિર 13 મેના રોજ બપોરે 12 વાગ્યે શરૂ થશે. શિબિરમાં ભાગ લેવા માટે 400 થી વધુ પ્રતિનિધિઓ અને નેતાઓ ઉદયપુર પહોંચી રહ્યા છે. તેમના માટે તમામ વ્યવસ્થા કરવામાં આવી છે.

ચિંતન શિબિરની તમામ બેઠકો તાજ અરાવલી ખાતે યોજાશે. શિબિરમાં ત્રણ ગૃપ ડિસ્કશન, 6 વિશેષ સમિતિઓની બેઠક અને કોંગ્રેસ કાર્યકારી સમિતિની મહત્વપૂર્ણ બેઠક યોજાશે. આ બેઠકમાં કોંગ્રેસના મુખ્યમંત્રી સહિત કાર્યકારી સમિતિના તમામ સભ્યો, કોંગ્રેસ સમિતિના સભ્યો સહિત તમામ મોટા નેતાઓ હાજર રહેશે. કોંગ્રેસના મોટાભાગના નેતાઓ ઉદયપુર પહોંચી ગયા છે. જેમાં સોનિયા અને પ્રિયંકા ગાંધી, શશિ થરૂર, કેસી વેણુગોપાલ, રણદીપ સુરજેવાલા, મલ્લિકાર્જુન ખડગે વગેરે સહિતના નેતાઓનો સમાવેશ થાય છે. રાહુલ ગાંધી, છત્તીસગઢના મુખ્યમંત્રી ભૂપેશ બઘેલ સહિત 74 નેતાઓ ટ્રેન દ્વારા ઉદયપુર પહોંચ્યા. સોનિયા અને પ્રિયંકા શુક્રવારે સવારે વિશેષ વિમાન દ્વારા ઉદયપુર પહોંચ્યા હતા.

ચિંતન શિબિર માટે તાજ અરાવલી, અનંતા રિસોર્ટ, ઓરિકા લેમન ટ્રી અને રેડિસન બ્લુ ખાતે નેતાઓ માટે રહેવાની વ્યવસ્થા કરવામાં આવી છે. રાહુલ, સોનિયા અને પ્રિયંકા ગાંધી સહિત મોટા ભાગના વરિષ્ઠ નેતાઓ તાજ અરાવલીમાં રોકાયા છે. હોટલોમાં 9 રાજ્યોના શેફને આમંત્રિત કરીને નેતાઓ માટે ખાસ વાનગીઓ તૈયાર કરવામાં આવી રહી છે.

નવ સંકલ્પ ચિંતન શિબિરમાં ભાગ લેવા ઉદયપુર પહોંચેલા વરિષ્ઠ નેતા રાહુલ ગાંધીનું કાર્યકરો દ્વારા સ્વાગત કરવામાં આવ્યું હતું. કોંગ્રેસનું ત્રણ દિવસીય ‘ચિંતન શિબિર’ શુક્રવારથી શરૂ થઈ રહી છે. રાહુલ ગાંધી દિલ્હીથી ટ્રેન દ્વારા ઉદયપુર પહોંચ્યા હતા. તેમની સાથે કોંગ્રેસના 74 નેતાઓ હાજર રહ્યા હતા. ચેતક એક્સપ્રેસમાં રાહુલ ગાંધી સહિત તમામ નેતાઓ માટે બે કોચ પહેલાથી જ આરક્ષિત હતા. દિલ્હીના સરાય રોહિલાથી ઉદયપુર સુધી અનેક સ્ટેશનો પર કોંગ્રેસના કાર્યકરો દ્વારા રાહુલ ગાંધીનું સ્વાગત કરવામાં આવ્યું હતું. આ દરમિયાન રાહુલે લોકોની શુભેચ્છાઓ સ્વીકારી અને સમસ્યાઓ પણ સાંભળી. ઉદયપુર રેલવે સ્ટેશન પર તહેવાર જેવો માહોલ હતો.

રાહુલ ગાંધી બસમાં બેસીને તાજ અરવલી હોટલ જવા રવાના થયા હતા. રાહુલ ગાંધી અને મુખ્યમંત્રી અશોક ગેહલોત એકસાથે બેઠેલા જોવા મળ્યા હતા. છત્તીસગઢના મુખ્યમંત્રી ભૂપેશ બઘેલ પાછળ બેઠા હતા. એક પછી એક રાજ્યની ચૂંટણીમાં હારથી પીડિત કોંગ્રેસ ઉદયપુરમાં ચિંતન શિબિરનું આયોજન કરી રહી છે. કોંગ્રેસનું આ ચિંતન શિબિર 13 થી 15 મે સુધી ત્રણ દિવસ ચાલશે.

નવ સંકલ્પ ચિંતન શિબિરનું ફોર્મેટ બહાર પડ્યું
ચિંતન શિબિરની શરૂઆત કોંગ્રેસ અધ્યક્ષ સોનિયા ગાંધીના સંબોધનથી થશે. 13મી મેના રોજ સવારે 11 વાગ્યા સુધીમાં 400થી વધુ પ્રતિનિધિઓ અને આગેવાનો ચિંતન શિબિરમાં પહોંચશે. ત્યારબાદ બપોરે 12 કલાકે ચિંતન શિબિર શરૂ થશે. કોંગ્રેસ અધ્યક્ષ સોનિયા ગાંધી બપોરે 2 વાગે ચિંતન શિબિરમાં હાજરી આપશે. ત્યાં રાજસ્થાન પ્રદેશ કોંગ્રેસ સમિતિના પ્રમુખ ગોવિંદ સિંહ દોતાસરા પાર્ટીના રાષ્ટ્રીય અધ્યક્ષનું સ્વાગત કરશે. બપોરે 2 વાગ્યે સોનિયા ગાંધીના સન્માનમાં સ્વાગત પ્રવચન આપવામાં આવશે. કોંગ્રેસ અધ્યક્ષ સોનિયા ગાંધી  2:10 કલાકે ચિંતન શિબિરમાં આવેલા લોકોને સંબોધિત કરશે. જેમાં ચિંતન શિબિરનો હેતુ અને દેશની વર્તમાન પરિસ્થિતિ વિશે સંબોધન કરશે. ચિંતન શિબિરમાં બપોરે 3 વાગ્યાથી સમૂહ સંવાદ શરૂ થશે જે સાંજે 5 વાગ્યા સુધી ચાલશે.

બીજા દિવસે પણ સમૂહ સંવાદ થશે.
ચિંતન શિબિરના બીજા દિવસે 14 મેના રોજ સવારે 10:30 કલાકે ચિંતન શિબિરનો કાર્યક્રમ સમૂહ સંવાદથી શરૂ થશે. ત્યારપછી સમૂહ સંવાદ બપોરે 2.30 વાગ્યા સુધી ચાલશે. બીજા દિવસનો કાર્યક્રમ રાત્રે 8 કલાકે પૂરો થશે. ત્રીજા દિવસે સવારે 11 વાગ્યાથી બેઠકો શરૂ થશે. ચિંતન શિબિરમાં વિવિધ ઠરાવો પસાર કરવામાં આવશે. બપોરે 1 કલાકે ચિંતન શિબિરમાં આવેલા તમામ પ્રતિનિધિઓ સાથે ગ્રુપ ફોટો સેશન થશે. રાહુલ ગાંધી પણ બપોરે 3 વાગે સંબોધન કરશે. આ પછી પ્રદેશ કોંગ્રેસ પ્રમુખ ગોવિંદ સિંહ દોતાસરા ચિંતન શિબિરમાં આવેલા તમામ આગેવાનોનો આભાર માનશે. ચિંતન શિવિર સાંજે 4:15 કલાકે સમાપ્ત થશે.