નાઈજીરિયામાં મોટી દુર્ઘટના, ચાલુ ક્લાસે શાળાનું મકાન ધરાશાયી, 22 બાળકોના મોત; 100થી વધુ ઘાયલ 

ઉત્તર-મધ્ય નાઈજીરિયામાં શુક્રવારે સવારે એક મોટો અકસ્માત થયો હતો. અહીં બે માળની સ્કુલ  ધરાશાયી થઈ હતી. આ દુર્ઘટના ત્યારે બની હતી જ્યારે વર્ગો ચાલી રહ્યા હતા. આ અકસ્માતમાં 22 વિદ્યાર્થીઓના મોત થયા છે, જ્યારે 100થી વધુ વિદ્યાર્થીઓ કાટમાળ નીચે ફસાયા હોવાની આશંકા છે. કાટમાળ નીચે ફસાયેલા વિદ્યાર્થીઓની શોધખોળ ચાલુ છે. ઘટનાસ્થળે રાહત અને બચાવ ટુકડીઓ તૈનાત કરવામાં આવી છે. 

ચાલુ કલાસે બની ઘટના

વાસ્તવમાં, વિદ્યાર્થીઓ અભ્યાસ માટે પઠાર રાજ્યના બુસા બુજી સમુદાયની સેન્ટ્સ એકેડમી સ્કુલમાં પહોંચ્યા હતા. વર્ગો શરૂ થયાની થોડી જ વારમાં શાળાનું મકાન ધરાશાયી થયું હતું. જણાવવામાં આવી રહ્યું છે કે અકસ્માતમાં ઘાયલ થયેલા લોકોમાં ઘણા 15 વર્ષ કે તેનાથી ઓછી ઉંમરના બાળકો હતા. પોલીસ પ્રવક્તા આલ્ફ્રેડ અલાબોએ જણાવ્યું હતું કે કુલ 154 વિદ્યાર્થીઓ ફસાયા હતા, પરંતુ તેમાંથી 132ને બચાવી લેવામાં આવ્યા હતા. વિદ્યાર્થીઓની વિવિધ હોસ્પિટલમાં સારવાર ચાલી રહી છે. આ અકસ્માતમાં 22 વિદ્યાર્થીઓના મોત થયા છે.

બચાવકાર્ય ચાલુ

નાઈજીરિયાની નેશનલ ઈમરજન્સી મેનેજમેન્ટ એજન્સીએ જણાવ્યું હતું કે અકસ્માત બાદ તરત જ બચાવ અને આરોગ્ય કર્મચારીઓ તેમજ સુરક્ષા દળોને ઘટનાસ્થળે તૈનાત કરવામાં આવ્યા હતા. તાત્કાલિક તબીબી સંભાળ સુનિશ્ચિત કરવા માટે, સરકારે હોસ્પિટલોને દસ્તાવેજો અથવા ચૂકવણી વિનાની સારવારને પ્રાથમિકતા આપવાનો નિર્દેશ આપ્યો છે, પ્લેટો સ્ટેટ ઇન્ફર્મેશન કમિશનર મુસા અશોમસે એક નિવેદનમાં જણાવ્યું હતું. રાજ્ય સરકારે આ દુર્ઘટના માટે શાળાના નબળા માળખા અને નદી કિનારે તેનું સ્થાન જવાબદાર ગણાવ્યું હતું.