ગૃહમંત્રીની ઓફિસ સામેના મોલમાં લાગી ભીષણ આગ, બે બાળકીઓના મોત

સુરતના પોશ વિસ્તારમાં આવેલા સિટીલાઈટ રોડ પર આવેલા ફોર્ચ્યુન મોલમાં અચાનક ભીષણ આગ ફાટી નીકળી હતી, જેના કારણે સમગ્ર વિસ્તારમાં અફરાતફરીનો માહોલ સર્જાયો હતો. મોલના ત્રીજા માળે સ્થિત અમૃતયા સ્પા અને જીમમાં લાગેલી આગ એટલી ભયાનક હતી કે સ્પામાં કામ કરતી બે મહિલાઓના શ્વાસ રૂંધાવાથી ઘટનાસ્થળે જ મોત થયા હતા.

તમને જણાવી દઈએ કે આ મોલ ગૃહમંત્રી હર્ષ સંઘવીની ઓફિસની સામે છે. ઘટનાની જાણ થતા જ ફાયર વિભાગની ટીમ ઘટના સ્થળે પહોંચી આગને બુઝાવવાની કામગીરી શરૂ કરી હતી.

અગ્નિશામકોએ જણાવ્યું કે આગ એટલી ઝડપથી ફેલાઈ કે થોડી જ ક્ષણોમાં તે આખા સ્પામાં ફેલાઈ ગઈ અને ચારેબાજુ ધુમાડાના ગોટેગોટા ઉભરાઈ ગયા, જેના કારણે અરાજકતા ફેલાઈ ગઈ. આગમાં ફસાયેલી મહિલાઓને બચાવવા માટે ફાયર ફાઇટરોએ લોડર ક્રેનની મદદથી મોલના વેન્ટિલેટરના કાચ તોડીને અમૃતયા સ્પામાં પ્રવેશવાનો પ્રયાસ કર્યો હતો. ઘણી જહેમત બાદ તેઓ સ્પામાં પ્રવેશવામાં સફળ રહ્યા હતા અને ફસાયેલી મહિલાઓને બચાવવાનો પ્રયાસ કર્યો હતો, પરંતુ સ્પામાં હાજર બે મહિલાઓના ધુમાડાના કારણે ગૂંગળામણના કારણે ઘટનાસ્થળે જ મોત નીપજ્યા હતા.

બે મહિલાઓના શ્વાસ રૂંધાવાથી મોત થયા હતા

લોકોએ જણાવ્યું કે અમૃતયા સ્પામાં કુલ પાંચ મહિલાઓ કામ કરતી હતી, જેમાંથી ત્રણ મહિલાઓ આગ લાગ્યા બાદ દરવાજામાંથી ભાગી ગઈ હતી પરંતુ બે મહિલાઓ બાથરૂમમાં ભાગવા માટે સ્પાની અંદર ગઈ હતી. આગ એટલી ઝડપથી ફેલાઈ હતી કે ધુમાડો ફેલાઈ ગયો હતો અને ધુમાડાને કારણે બંને મહિલાઓના શ્વાસ રૂંધાવાથી મોત થયા હતા.

પ્રાથમિક માહિતી મુજબ બંને મહિલાઓ નાગાલેન્ડની રહેવાસી હોવાનું અને બંને સુરતમાં રોજીરોટી માટે આવ્યાં હતાં. હાલ આગનું કારણ શોર્ટ સર્કિટ હોવાનું કહેવાય છે. પોલીસ ઘટનાસ્થળે હાજર રહી તપાસ કરી રહી છે.