મુડેઠા પાસે બાઈક અને છકડા વચ્ચે અકસ્માત સર્જાયો

ડીસા-રાધનપુર હાઈવે પર મુડેઠા નજીક છકડા અને બાઇક વચ્ચે અકસ્માત સર્જાયો હતો.જેમા બાઇકચાલકનું સારવાર દરમિયાન મોત થતા ભીલડી પોલીસે ઘટનાસ્થળે પહોંચી વધુ તપાસ હાથ ધરી છે.જેમાં ડીસા તાલુકાના મુડેઠા ખાતે રહેતા પ્રહલાદ પરમાર નામનો યુવક તેના બાઈકમાં પેટ્રોલ ભરાવવા માટે મુડેઠા થી ભીલડી તરફ જઇ રહ્યો હતો.તે સમયે સામેથી આવી રહેલો છકડો અને બાઈક સામસામે ટકરાતા અકસ્માત સર્જાયો હતો.જેમા બાઈક સવાર રોડ પર પટકાતા તેને ગંભીર ઈજાઓ પહોંચી હતી.આમ અકસ્માતની જાણ થતા આજુબાજુના લોકો,તેના પરિવારજનો તેમજ 108 એમ્બ્યુલન્સની ટીમ ઘટનાસ્થળે પહોંચી હતી અને ગંભીર રીતે ઇજાગ્રસ્ત બાઈકચાલકને સારવારઅર્થે ભીલડી પ્રાથમિક આરોગ્ય કેન્દ્રમાં ખસેડાયો હતો.જ્યાં પ્રાથમિક સારવાર આપ્યા બાદ તેની હાલત વધુ નાજુક જણાતા તેને વધુ સારવાર માટે ડીસાની સરકારી હોસ્પિટલમાં ખસેડાયો હતો.જ્યાં ડોક્ટરોએ તેને મૃત જાહેર કર્યો હતો.આમ આ અકસ્માત અંગે મૃતકના પરિવારજનોએ છકડા ચાલક વિરૂદ્ધ ફરિયાદ નોંધાવી ભીલડી પોલીસે વધુ તપાસ હાથ ધરી છે.